“Osiris” zondi Bennu asteroididan olingan tuproqning bir qismidan ajraldi. Chunki apparat kutilganidan ko‘p tuproq to‘plagan

Bir necha kun avval Bennu asteroididan tuproq yig‘ib, Yerga yubormoqchi bo‘lgan “Osiris” zondi namunaning bir qismidan ajraldi, deb yozadi Meduza.

NASA ma’lumotlariga ko‘ra, “Osiris” asteroid yuzasidan kutilganidan ancha ko‘proq (bir necha yuz grammga ko‘proq) material to‘plagan, chunki apparat asteroidga yaqinlashganida manipulyator qo‘l uning yuzasiga chuqurroq kirgan. Shu tufayli konteyner qopqog‘i mahkam yopilmagan va to‘plangan zarralar uchib chiqib ketmoqda.

“Aslini olganda, biz o‘z muvaffaqiyatimizning qurboniga aylandik”, — deydi NASA olimlari.

Agentlikning aniqlik kiritishicha, endi namuna solingan konteyner Yerga yuborilishi uchun uning maxsus germetik kapsulaga olib o‘tilishini tezlashtirish kerak, chunki bu hozir qilish mumkin bo‘lgan yagona chora.

OSIRIS-REx kosmik zondi Bennu asteroidiga yaqinlashib, uning tuprog‘idan namuna olgani haqida NASA o‘z Twitter’ida ma’lum qilgan edi.

OSIRIS-REx zondi 2016-yilning sentabrida Florida shtatidagi Kanaveral sahrosidan uchirilgan. U Bennuga 2018-yilning dekabrida yaqinlashgan va keyinroq asteroid orbitasiga chiqishga erishgan. Zond Yerga 2023-yilning sentabrida qaytishi va tuproq namunalarini olib kelishi kerak.

Bennu — Yerdan 320 million kilometr uzoqlikdagi qadimiy asteroid. Bennuning ayrim mineral namunalari Quyosh tizimidan ham katta bo‘lishi mumkin. Asteroid diametri 492 metrga teng.

Bennuni tadqiq etish olimlarga Quyosh tizimidan oldingi davrni o‘rganish va Yerda hayot qanday yuzaga kelgani to‘g‘risida ko‘proq ma’lumotlarga ega bo‘lishga yordam beradi.