Nokia’ning qaytishi: Nokia 2.4, 3.4 va Jeyms Bond smartfoni taqdim etildi (video)

Pandemiya hatto finlarga ham rahm qilmadi: HMD Global’ning 2019-yildagi so‘nggi anonsidan keyin to‘rtinchi avlod hamyonbop smartfonlari rasman endi taqdim etildi. Yangi smartfonlar katta sig‘imli batareya, “toza” Android va hamyonbop narxga ega, deb yozadi Hi-Tech.Mail.ru.

Nokia 2.4 — ixcham va hamyonbop

Smartfon “xalqbop” lineykani davom ettirmoqda — Nokia 1’dan keyingi eng hamyonbop model. Nokia 2.3’dan asosiy farqi: batareya sig‘imi 4500 mA/soatga yetgan, orqa panelida barmoq izi skaneri paydo bo‘lgan. Avvalgi model faqat yuz orqali blokdan chiqarilgan bo‘lsa, yangi modelda ushbu funksiya ham mavjud. MediaTek Helio A22 protsessori o‘rnini sakkiz yadroli Helio P22 egallagan.

2/32 gigabaytli versiyadan tashqari 3/64 gigabaytli model ham paydo bo‘lgan. Nokia 2.3 Andorid 10 operatsion tizimida sotuvga chiqqan, biroq kompaniya Android 11’ga o‘tishga ham tayyorligini bildirgan, bu yaqin oylar ichida amalga oshadi. Tizimning optimallashuvi ko‘p sa’y-harakat talab etmaydi. Qurilma korpusida hatto Google Assistant uchun alohida tugma ham bor.

Uchtalik o‘rin bir vaqtning o‘zida ikkita NanoSIM-karta va 512 gigabaytli MicroSD o‘rnatishga mo‘ljallangan. MicroUSB razyomi OTG’ni qo‘llab quvvatlaydi, 3,5 millimetrli razyom esa — simli naushniklar uchun. Bu borada Nokia o‘z an’analariga sodiq. Interfeyslari qatoridan — Bluetooth 5.0, FM-radio, Wi-Fi 2,4 GGs o‘rin olgan. Shu bilan birga, NFC-modul yo‘qligi sabab smartfon orqali xaridlarni amalga oshirib bo‘lmaydi.

Old tomonidan diaogonali 6,5 dyuymli HD+ sifatga ega IPS displey o‘rin olgan. Orqa tomoni 3D qoplamali plastikdan ishlangan. Sotuvga korpusning uch xil rangi chiqadi: qora, qirmizi va ko‘k. Orqa qopqoq ostida 4500 mA/soat batareya mavjud. Bu kabi sig‘imli akkumulyator 1,5 kunga yetishi kerak. Biroq quvvatlanish tezligi past: maksimal quvvati — 5 vatt.

Asosiy kamera ikkitalik: bosh modul 13 megapiksell va yordamchi 2 megapikselli sensor. Asosiy o‘zgarish — katta modellardan sun’iy intellekt yordamida ishlaydigan tungi rejim. Endi hamyonbop model qorong‘ida ham yaxshi suratga oladi.

22-sentabrdan boshlab Nokia 2.4’ga oldindan buyurtmalar ochildi. 3/64 gigabaytli versiya narxi 142 dollarni tashkil etadi.

Nokia 3.4 — Qualcomm protsessor va “ultrakeng burchak”

Nokia 3.3’dan sakrab o‘tgan lineyka Qualcomm protsessorlariga bo‘lgan sadoqatini saqlab qolgan. Yangi modelga Snapdragon 460 o‘rnatilgan — xuddi Oppo, Realme, Vivo brendlaridagi kabi. 3 gigabaytli tezkor xotiradan kelib chiqiladigan bo‘lsa, Nokia 3.4’da yengilroq o‘yinlarni o‘ynash mumkin bo‘ladi. Android 11 ham vaqt o‘tishi bilan paydo bo‘ladi.

Yangi model Nokia 5.3’dagi kabi aylanasimon kameralar dizayniga ega. Unda chaqnoq va uchta modul joylashgan: asosiysi 13 megapiksell, chuqurlikni o‘lchovchi 2 megapiksell va “ultra keng burchakli” 5 megapiksell. Kamera chaplangan portretlarni, tungi foto va hatto “tungi portretlar”ni ham suratga olishga qodir.

Nokia 3.4 o‘zidan avvalgi modeldan deyarli qolishmaydi: 3D qoplamali plastik korpus, alyuminiyli yon qismlar, uchtalik SIM-karta o‘rni. Old tomonida HD+ sifatni qo‘llab-quvvatlovchi IPS-displey.

Nokia 3.4’ni hozirda 181 dollar evaziga oldindan buyurtma qilish mumkin.

Nokia 8.3 5G — 5G aloqa tarmog‘i va alohida videosensorga ega flagman

Mazkur smartfon mart oyida taqdim etilgandi. Bunga qadar kompaniya “Agent 007: o‘lish vaqti emas” filmining rasmiy hamkoriga aylangan. Pandemiya sabab film va smartfon savdosi boshqa sanaga ko‘chirilgan. Endilikda esa ikkalasining ham taqdimot sanasi ma’lum: Deniel Kreyg ishtirokidagi Jeyms Bondning so‘nggi qismi 19-noyabrda boshlanadi. Smartfonga esa 22-sentabrdan oldindan buyurtma berish mumkin. Modelning 8/128 gigabaytli versiyasi 650 dollardan taklif etilmoqda.