Butun dunyoda koronavirus bilan kasallanganlar soni 26 million kishidan oshdi. Bu haqda kasallik tarqalishini real vaqtda kuzatib kelayotgan Jons Hopkins universiteti ma’lumotlarida keltirilgan.
Foto: Getty Images
Bir oy ichida dunyoda koronavirus bilan kasallanganlar soni 8 million kishidan oshgan: 3-avgust kuni 18 million kishida COVID-19 aniqlangan edi. O‘tgan oy davomida har 3—5 kunda million kishi kasallikka chalingan.
Koronavirusga chalinganlarning aksariyati AQShda qayd etilgan — 6,1 million. Uning ortidan Braziliya (3,9 million) va Hindiston (3,8 million) o‘rin olgan. Rossiya 1 million kasal bilan 4-o‘rinda ketmoqda.
Koronavirus bilan kasallanish eng ko‘p qayd etilgan davlatlar ketma-ketligi quyidagicha:
- Peru — 657 ming;
- Kolumbiya — 633 ming;
- JAR — 630 ming;
- Meksika — 610,9 ming;
- Ispaniya — 479,5 ming;
- Argentina — 439 ming.
Hozirga qadar dunyoda koronavirus oqibatida vafot etganlar soni 863 ming kishini tashkil etmoqda. Ushbu ko‘rsatkich bo‘yicha ham AQSh birinchilikda ketmoqda — 185,7 ming qurbon. Uning ortidan Braziliya (123,7 ming) va Hindiston (67,3 ming) o‘rin olgan.
Eslatib o‘tamiz, dunyoda koronavirusga chalinganlar soni 3-avgust kuni 18 millionga, 7-avgust kuni 19 millionga, 10-avgustda 20 millionga yetgan, 15-avgust kuni esa 21 milliondan, 19-avgust kuni esa 22 milliondan oshgandi. 22-avgustda bu ko‘rsatkich 23 millionga yetgan. 27-avgustda 24 milliondan, 30-avgust kuni esa butun dunyo bo‘ylab koronavirus infeksiyasi bilan kasallanganlar soni 25 million kishidan oshgan.
