24 августдан эътиборан «ММФИ» Миллий тадқиқот ядро университети (МТЯУ)нинг Тошкент филиалига янги 2020/2021 ўқув йили учун кириш имтиҳонлари бошланди.
Тошкентдаги ММФИ МТЯУ ўз фаолиятини 2019 йил сентябрида, Ўзбекистонда қурилажак атом электр станциясига кадрлар тайёрлаш дастури доирасида 100 нафар талабани ўқишга қабул қилиш билан бошлаган эди. 2020 йилда эса ўқишга ҳужжатларни қабул қилиш карантин талабларига мувофиқ ҳолда масофадан амалга оширилди.
1 августга қадар олий ўқув юртининг сайти орқали бакалавриатнинг «Ядро энергетикаси ва иссиқлик физикаси», «Ядро физикаси ва технологиялар», «Иссиқлик энергияси ва иссиқлик физикаси», «Электр энергетикаси ва электротехника» юналишлари бўйича жами 731 нафар абитуриентнинг ҳужжатлари қабул қилинган.
Имтиҳонлар 24—29 август кунлари Талабалар шаҳарчасида бўлиб ўтиши белгиланган. Абитуриентлар математика, физика ва рус тилидан имтиҳон топширади. Ҳар бир имтиҳон ёзма равишда олиниб, билимлар 100 баллик мезонда баҳоланади. Ҳар бир имтиҳонда 40 баллик қуйи чегара қўйилган бўлиб, ундан паст балл олган абитуриентлар кейинги имтиҳонга қўйилмайди ва танловда ҳам қатнашмайди.
«Кириш имтиҳони натижалари олий ўқув юрти сайтида эълон қилиб борилади. Энг кўп балл олган 100 нафар талаба эса ММФИ МТЯУ Тошкент филиалида давлат гранти асосида ўқишга қабул қилинади», — дейилади «Ўзатом» агентлиги матбуот хизматининг «Дарё»га тақдим этилган ахборотида.
Узрли сабабларга кўра имтиҳонларда қатнаша олмаган абитуриент (имтиҳонга келолмаганлигига асосли сабаблари бўлганини тасдиқловчи ҳужжатларни тақдим этган ҳолда) захира куни — 29 августда имтиҳон топшириши мумкин. Захира кунида фақат битта имтиҳон топширилади.
Маълумот учун, ММФИ МТЯУ муҳандислик-физика соҳасида мутахассисларни тайёрлаш бўйича дунёнинг энг салоҳиятли университетларидан бири ҳисобланади. Унинг Тошкент филиали Президент Шавкат Мирзиёевнинг 2018 йилнинг 20 июлдаги қарори билан ташкил этилган.
Изоҳ (0)