Samarqand shahrida karantin paytida hod-dog tayyorlab bermagan bozor qorovulini kaltaklagan A.T. uch yil muddatga ozodlikdan mahrum qilindi, deya xabar berdi “Daryo” muxbiri.

Jinoyat ishlari bo‘yicha Samarqand shahar sudida bo‘lib o‘tgan sud majlisida sudlanuvchi A.T. aybiga qisman iqror bo‘lib, 2020-yil 28-mart kunidan 29-martga o‘tar kechasi bo‘lg‘usi turmush o‘rtog‘i bilan telefonda tortishib qolganligi uchun asablarini tinchlantirish maqsadida savdo do‘konidan ichimlik suvi xarid qilish uchun ko‘chaga chiqqanini aytib bergan.

Ta’kidlanishicha, A.T. 2020-yil 29-mart kuni soat 02:30 da Samarqand shahridagi dehqon bozori oldida jamiyatda yurish-turish qoidalarini buzib, 63 yoshli Husinali Murodovning qo‘l va oyoqlariga urgan va og‘ir tan jarohati yetkazgan.

Jabrlanuvchi Husinali Murodovning sudda ma’lum qilishicha, A.T. uning yoniga notanish kishi bilan kelib, hod-dog qilib berishni so‘ragan. U esa karantin payti ishlamayotganligini, hod-dog uchun kerakli mahsulotlar yo‘qligi bildirgan. A.T. esa otaxonni sababsiz qo‘li bilan ura boshlagan. Keyin uning qulog‘idan torib, do‘kondan tashqariga olib chiqqan va nima uchun hod-dog qilib bermasligini so‘rab, baqirgan. So‘ng yana 10-15 metrga olib ketib, qo‘llari bilan boshiga urgan. A.T. otaxonni haqorat qilib, urishni davom ettirganda tanishi ularni ajratib, “boboyni o‘ldirib qo‘yasan” degan.

Jinoyat ishlari bo‘yicha Samarqand shahar sudi sudyasi Zarifa Ahmedovaning “Daryo”ga ma’lum qilishicha, sudlanuvchi A.T. Jinoyat kodeksining 104-moddasi 2-qismi “v”, “e” bandlari (Bezorilik qilib, shafqatsizlarcha qasddan badanga og‘ir shikast yetkazish) bilan aybli deb topilib, 3 yil muddatga ozodlikdan mahrum qilingan.