“Chelsi” bosh murabbiyi Frenk Lempard Premyer Liga 37-turi doirasida “Liverpul”ga qarshi kechgan o‘yindan (3:5) so‘ng o‘z fikrlari bilan o‘rtoqlashdi.
Foto: Twitter
Trent Aleksander-Arnoldning jarima zarbasidan urgan goli va Yurgen Klopp bilan tortishuv haqida
“Menimcha, o‘sha vaziyatda Kovachich qoida buzmadi. Ko‘plab qarorlar bizning foydamizga bo‘lmadi. Biroq mening Klopp bilan muammom yo‘q, u o‘z jamoasini fantastik boshqarmoqda.
“Liverpul”ni hurmat qilaman, ular ligada g‘olib chiqdi, biroq shuni deb juda kekkayib ketish yaramaydi. Men shuni bildirib qo‘ymoqchi edim, ammo hammasi ortda qoldi. O‘yin vaqtida hissiyotlarga berilib ketish mumkin, shunday bo‘ldi ham.
O‘yin haqida
“Ajabtovur o‘yin bo‘ldi. Hatto “Liverpul” oldinga o‘tib ketgan vaqtda ham jamoam hali o‘yinda ekanini anglab turardim, bu bizning harakatlarimizdan ham ma’lum.
Hech qachon mag‘lubiyatdan qoniqib bo‘lmaydi, biroq “Liverpul”ning dastlabki gollari saviyasiga qarasak, bu qanday joy ekani va nima sababdan ular bu qadar omadli ekani ko‘rinadi. Biz ham shunga intilyapmiz”, — deydi Lempard.
Eslatib o‘tamiz, “Liverpul”ning ikkinchi gol oldidan Mateo Kovachich jarima maydoni yaqinida Sadio Manega nisbatan qo‘pollik ishlatdi deb baholandi. Shundan keyin har ikki jamoa murabbiylari o‘rtasida tortishuvli holat yuz berdi. Belgilangan jarima zarbasini Trent golga aylantirdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
