Mas’uliyati cheklangan jamiyatlar obligatsiya chiqarish va joylashtirish huquqiga ega bo‘ldi. Prezident Shavkat Mirziyoyev bu boradagi tegishli qonunni 21-iyul kuni imzoladi, deb xabar beradi “Xalq so‘zi Online”.
Hujjat bilan, xususan, “Mas’uliyati cheklangan hamda qo‘shimcha mas’uliyatli jamiyatlar to‘g‘risida”gi hamda “Qimmatli qog‘ozlar bozori to‘g‘risida”gi qonunlarga o‘zgartirish kiritilgan.
MChJlarga korporativ obligatsiyalar chiqarish huquqini berish to‘g‘risidagi taklifni 2019-yilning noyabrida Kapital bozorini rivojlantirish agentligi bergan edi. O‘shanda cheklovlarning bekor qilinishi biznesga alternativ moliyalashtirish manbasini taqdim etishi ta’kidlangandi.
Shuningdek, qonun bilan korporativ obligatsiyalarni chiqarish sharoitiga ham o‘zgartirish kiritilgan. Shunday qilib, endi obligatsiyalar miqdori emitentning ustav kapitali miqdoridan oshib ketishi mumkin, biroq emitent bu miqdordan ortiq bo‘lgan garov ta’minoti taqdim etishi kerak.
Emitentlar faqat o‘tgan bir yil uchun rentabellik, to‘lov qobiliyati, moliyaviy barqarorlik va likvidlikning ijobiy ko‘rsatkichlariga ega bo‘lishi kerak (oldin uch yil edi).
Infratuzilma obligatsiyalari oldingidek sharoitda chiqarilaveradi. Davlat ulushi 50 foiz va undan ortiq bo‘lgan xo‘jalik korxonalar, shuningdek, davlat korxonalari infratuzilma obligatsiyalarini chiqarishda Moliya vazirligi bilan kelishishi kerak.
Ma’lumot uchun, hozirgi kunda O‘zbekistonda iqtisodiyotning turli sohalarida faoliyat yuritadigan mas’uliyati cheklangan jamiyat (MChJ) ko‘rinishidagi 148 mingdan ortiq korxona mavjud.
Izoh (0)