Ingliz tilining Merriam-Webster lug‘atida “irqchilik” so‘zining ta’rifi o‘zgartiriladi. Bu haqda lug‘atning bosh muharriri Piter Sokolovski ma’lum qildi, deb yozmoqda CNN.

Foto: UPI

Bu qaror missurilik Kennedi Mitchem bilan olib borilgan yozishmalardan keyin qabul qilingan.

Irqchilikning lug‘atdagi hozirgi ta’rifi quyidagicha: “Irqchilik — irq insonning xususiyatlari va qobiliyatlarini hal qiluvchi asosiy omil ekanligiga va irqiy tafovutlar u yoki bu irqning ustunligini keltirib chiqarishiga bo‘lgan ishonch”.

Mitchem Merriam-Webster tahririyatiga maktub yozgan va irqichilik shunchaki noto‘g‘ri tushuncha emas, balki nafratning tizimli ravishda yuzaga kelishi ekanligini aniq ko‘rsatishni so‘ragan. Lug‘at muharrirlari bunga rozilik bergan.

Sokolovskining aytishicha, lug‘at irqchilikni “doktrina yoki siyosiy dastur”, shuningdek, irqchilik farazlariga asoslangan “siyosiy yoki ijtimoiy tizim” sifatida ham ta’riflaydi.

Uning tushuntirishicha, lug‘atning chop etiladigan talqini kitobga ko‘p so‘zni joylashtirish kerak bo‘lgani sababli qisqa ta’rifdan foydalanadi. Onlayn lug‘atda esa cheklov yo‘q. Merriam-Webster bir yilda 2-3 marta yangilanadi, irqchilikning yangi ta’rifi yangilangan talqinda chiqadi.

Merriam-Webster’ning qarori AQShda politsiya zo‘ravonligi va irqchilik sababli yuzaga kelgan noroziliklar bilan bir vaqtga to‘g‘ri keldi. Namoyishlar politsiya tomonidan qo‘lga olinishi vaqtida jabrlanib vafot etgan afroamerikalik Jorj Floydning o‘limidan keyin boshlandi.