Matyoqub Matchonov Hoshim Arslonovning teatrga sadoqati poymol qilingani va yoshi katta san’atkorlarni chetlashtirayotgan rahbarlar haqida gapirdi (video)

O‘zbekistonda xizmat ko‘rsatgan artist, dublyaj ustasi, taniqli aktyor Hoshim Arslonov 29-may kuni 64 yoshida olamdan o‘tdi.

O‘zbekistonda xizmat ko‘rsatgan artist Matyoqub Matchonov “Daryo” muxbiri Feruz Muhammadga do‘sti Hoshim Arslonovning hayotining so‘nggi kunlari, qanday kasallik bilan olamdan o‘tgani haqida gapirib berdi.

Matyoqub Matchonov suhbat davomida Hoshim Arslonovni xotirlab, do‘sti nima sababdan teatrdan ketgani, umrining oxirigacha teatrni qumsab o‘tgani, yoshi katta san’atkorlarni chetga chiqarib qo‘yayotgan san’at maskani rahbarlari haqida gapirib berdi.

Hoshim teatr uchun yaralgan edi. Teatr rahbariyatdagi o‘zgarishlardan keyin, bizga birov ‘ketinglar, teatrni bo‘shatinglar’, degani yo‘q, ammo bizning aqlimiz, fikrlashimiz joyida, o‘z-o‘zidan Hoshim Arslonov o‘ynagan spektakllar repertuardan olib tashlangandan keyin, nima deb o‘ylash mumkin. Demak, biz yangi rahbariyatning formatiga to‘g‘ri kelmadik. ‘Men ketsam kerak, bularning formatiga to‘g‘ri kelmadim’, deganimda, ‘men ham ketaman’, dedi. ‘Hoshim seni ko‘z ochib ko‘rgan teatring, ishlagin’, degandim. Garchand 80-yillarning oxirida juda ko‘p teatrlardan takliflar bo‘lgan, Milliy teatrga ham taklif bo‘lgan, biroq u ko‘z ochib ko‘rgan teatridan ketmagan edi. Ko‘z ochib ko‘rgan teatriga juda ham sadoqatli inson edi, mana shu sadoqatli insonni qadri oxirgi vaqtda  poymol qilindi.  Hoshim saraton kasali bilan vafot etdi. Saraton kasalining asosida, negizida nerv, asab yotadi. Bu Allohning irodasi, hech kimni ayblamoqchi emasman, lekin banda ham ba‘zi bir narsalarga sababchi bo‘ladi. Endi bu ularning vijdoniga havola.

Chunki u teatr bilan tirik edi, dublyaj, kino o‘z yo‘liga, u teatr bilan tirik edi. ‘O‘zbekkino’ga ishga o‘tib ketganimdan keyin, u yerga juda ko‘p kelar edi, juda ko‘p suhbatlashar edik. Bir kun kelib ‘chiday olmayapman Matyoqub, sahnani yomon sog‘indim, tushlarimga kirib chiqyapti’, dedi. ‘Hoshim sen teatr uchun yaratilgansan, teatrga borgin’, dedim. ‘Borsam, meni qabul qilisharmikan’, dedi. Teatrni tamal toshini qo‘ygan aktyorlardan biri edi. Nega qabul qilishmaydi, dedim.

Yoshi katta san’atkorlarni chetga chiqarib qo‘yayotgan san’at maskanlarining rahbarlariga bir narsani aytmoqchiman. Insonlarni tirikligida, ozgina bo‘lsa ham, uning avvalgi qilgan mehnatlarini inobatga olishlarini, e’tiborga olishlarini so‘rayman. Ko‘p emas, ozgina. Ularga ko‘p narsa kerak emas, ularga moddiy ta’minot ham kerak emas. Misol uchun hayit kunlarida 2 kilogramm shakar, go‘sht, moy olib borish ham, shu orqali shov-shuv qilish ham kerak emas.

Ota-bobolarimizning bug‘doy noning emas, bug‘doy so‘zing bo‘lsin, degan gaplari bor. Ozgina e’tibor bering. Meni nazarimda Hoshim teatrda ishlaganida ancha uzoq yashagan bo‘lar edi. Hammasi Allohdan, hech kimni ayblamoqchi emasman, lekin, agar shu so‘zlarimni san’at maskanlarining rahbarlari eshitayotgan bo‘lsa, faxriylarga ozgina e’tiborli bo‘lishlarini iltimos qilaman, birdan bir iltimosim shu.

Matyoqub Matchonov, O‘zbekistonda xizmat ko‘rsatgan artist