Avstriyaning Braunau-am-Inn shahridagi Adolf Gitler tug‘ilgan uy politsiya idorasiga aylantiriladi. Bu haqda Kurier nashri Avstriya ichki ishlar vazirligida o‘tkazilgan matbuot anjumanidagi ma’lumotlarga tayanib xabar bergan.

Foto: Leonhard Foeger

Xabarga ko‘ra Marte arxitektura byurosi tenderda yutib chiqqan. Marte kompaniyasi Uchinchi reyx rahbari yashagan uyni qayta ta’mirlash ishlarini olib boradi.

Foto: Bild

Foto: Bild

Tenderda jami 12 ta kompaniya ishtirok etgan. Qayta jihozlash va uyni ta’mirlash ishlari 2022-yil oxirida yakuniga yetishi va taxminan 5 million yevroga aylanishi mumkin. Shuningdek, uy neytral maqomga ega bo‘ladi va neonatsistlarning bu yerga kelishi to‘xtaydi.

Binoda XVII asrdan 1965-yilga qadar kutubxona, shuningdek, bank bo‘linmasi va maktab faoliyat olib borgan. 1977-yildan 2011-yilgacha uydan ustaxona, imkoniyati cheklangan odamlar uchun pansionat uchun joy sifatida foydalanilgan.

2016-yilda hukumat binoni o‘z ixtiyoriga olmoqchi bo‘lgan, biroq uy egasi ushbu takliflarga rad javobini bergan.

Foto: Reporters

Yakunda ushbu joyni olish uchun hukumat tomonidan alohida qonun qabul qilingan, so‘ngra sud tartibi bo‘yicha kompensatsiya berishga to‘g‘ri kelgan. Natijada uy egasi bo‘lgan ayolga 812 ming yevro berildi. Avstriya IIV esa davlatga 2019-yildagi ekspropriatsiya uchun kompensatsiya to‘ladi.