Tramp cherkov oldida suratga tushishi uchun Vashington politsiyasi namoyishchilarni ko‘zdan yosh oqizuvchi gaz bilan tarqatib yubordi (foto)

Vashingtonda politsiya namoyishchilarni Oq uy yaqinidagi bog‘dan ko‘zdan yosh oqizuvchi gaz bilan tarqatib yubordi, deb xabar bermoqda CNN.

Bu jarayon AQSh prezidenti Donald Trampning Oq uy yaqinidagi bog‘da chiqish qilayotgan paytda yuz berdi. Tramp, agar shahar rasmiylari ko‘chalardagi tartibsizliklarni o‘zlari bostira olmasa, bunga harbiylarni jalb qilish bilan tahdid qildi.

Prezident nutqini tugatganidan so‘ng Oq uy hududidan tashqariga chiqib, Lafayet bog‘ini kesib o‘tib, avliyo Ioan yepiskopik cherkov yonida Injil bilan suratga tushdi.

Suratga tushish jarayoni 17 daqiqacha davom etgan. Unda Tramp “Biz dunyodagi buyuk mamlakatga egamiz. Uni xavsizlikda saqlang”, deb aytgan.

CNN manbasining xabar berishicha, cherkov oldida suratga tushish ishlari Trampning tartibsizliklar vaqtida bunkerda yashirinib o‘tirgani haqidagi xabarlardan jahli chiqqani uchun ham uyushtirilgan.

Ehtimol shuning uchun ham namoyishchilar tarqatib yuborilgan. Oq uyning o‘zida esa hudud namoyishchilar Vashingtonda joriy etilgan komendantlik soatlariga rioya qilmagani uchun bir necha ogohlantirishlardan keyin tozalangani ta’kidlangan. Kommendantlik soati kechki soat 07:00 da boshlanadi. Tramp Oq uydan soat 07:01 da chiqqan.

Eslatib o‘tamiz, AQShda norozilik harakatlari bir haftadan beri davom etmoqda. Namoyishchilar dastlab Minneapolis ko‘chalariga chiqqan edi, keyinchalik esa ko‘plab yirik shaharlarni ham qamrab oldi. Bunga Minneapolis shahri politsiyasi vakili 25-may kuni 46 yoshli afro-amerikalik Jorj Floydni qo‘lga olish chog‘ida uni tutib, yerga yotqizgan va tizzasi bilan bo‘ynini bosgani oqibatida uning vafot etgani sabab bo‘lgan. Holat aks etgan video ijtimoiy tarmoqlarda tarqalgach, AQShning turli hududlarida norozilik namoyishlari boshlangan.