Suv toshqini sabab xavfsiz yerga ko‘chirilgan Qozog‘istonning Turkiston viloyati aholisi qanday hayot kechirmoqda? (foto)

Qozog‘istonning Turkiston viloyatida bir nechta qishloqlarning aholisi xavfsiz joyga ko‘chirilgan. Ular Maqtaaral tumanining evakuatsiya punktlariga joylashtirilgan. Tengrinews.kz evakuatsiya qilingan odamlarning holati haqida fotoreportaj tayyorlagan.

So‘nggi ma’lumotlarga ko‘ra, hududdagi uylar suv ostida qolgani tufayli 32 mingga yaqin aholi o‘z xonadonlarini tark etgan. Ularning ko‘pchilik qismi Jetisay va Maqtaaral tumanlarida yashaydigan qarindoshlarinikiga, shuningdek, Chimkentga ko‘chgan. Favqulodda holat yuz bergani tufayli ularni blokpostlardan ortiqcha tekshiruvlarsiz shaharga kiritishgan.

Qolganlar esa maktablar, bog‘chalar, masjidlar va Atakent qishlog‘idagi kollej yotoqxonasiga joylashtirilgan. Tumanda evakuatsiya qilingan bu kabi yashash punktlari 24 ta. Shunday joylardan biri 9-umumiy o‘rta ta’lim maktabi binosida.

Mahalliy hokimlik mutasaddilari evakuatsiya qilinganlar haqida ma’lumotlarni yozib olmoqda.

Ijtimoiy masofalanish tartibi tufayli odamlar masofa saqlagan holda suhbat qurmoqda. Ular bir-birlariga sodir bo‘lgan toshqin haqida, shuningdek, internetdagi so‘nggi yangiliklar haqida gapirib bermoqda.

Odamlarning aksar qismi shoshilinch ravishda uylarini tark etgan, faqat asosiy hujjatlar – pul, ozroq kiyim-kechak olishga ulgurgan.

Evakuatsiya hududidagi odamlar turli ishlar bilan band. Isinib olish uchun sport bilan shug‘ullanayotganlar, voleybol o‘ynayotganlar va turnikda osilayotganlar ko‘p.

Favqulodda ko‘chirilganlar orasida katta qozon-o‘choqda kechki ovqat tayyorlayotganlar ham bor. Ovqatning hajmi katta, sababi bu yerdagi hammaga yetishi lozim. Har bir evakuatsiya punktida kamida 100 nafardan odam jamlangan.

Atakentdagi boshqa bir maktabda ham shunday vaziyat hukmron. Ovqat tayyorlanadigan oshxona ko‘chaning o‘zida. Taom ham qozon-o‘choqda tayyorlanmoqda.

Bolalar va o‘smirlar esa ovqat tayyorlashda kattalarga yordam bermoqda. Ovqat pishgunicha samovarda choy qaynatishadi.

Kichik yoshdagi bolalar onalaridan uzoq ketmaydi. Maktab hovlisida sayr qilishadi yoki kattalarning suhbatini eshitishadi.

Bino ichkarisida turli o‘yinlar o‘ynayotgan bolalar ham yetarlicha. Sinf xonalarga matraslar to‘shab, odamlar uxlashi uchun sharoit yaratilgan.

Ko‘ngillilar ovqatlanish joyiga aylantirilgan sport zaliga dasturxon yozib, odamlarni ovqatlanishga chaqiradi.

Oziq-ovqatlar va maishiy buyumlar Qozog‘istonning turli hududlaridan yetib kelayotgan ijtimoiy yordam tarzidagi mahsulotlar turgan ombordan olinadi. Evakuatsiya qilinganlarga Jambil viloyati va bir yil avval o‘zlari ko‘makka muhtoj bo‘lgan Aris shahridan turli buyum, oziq-ovqat mahsulotlari yuborilgan.

Fuqarolar taqdiriga befarq bo‘lmagan tadbirkorlar un, shakar, o‘simlik yog‘i, guruch, makaron mahsulotlari va shaxsiy gigiyena vositalarini yuborgan.

Eslatib o‘tamiz, 1-mayda Sirdaryo viloyatidagi Sardoba suv omborida ro‘y bergan texnogen hodisa tufayli suv toshqini sodir bo‘lgan. Ertasi kun tongda Qozog‘istonning Maqtaaral tumanidagi kollektordan suv toshib ketishni boshlagan. So‘ngra Jenis va Jana Turmis qishloqlari hududini suv qoplagan. Shundan keyin Mirzakent—Jenis—Jana Turmis avtomobil yo‘li ham suv ostida qolgan.

Hududda Jana Turmis, Jenis, Firdousi, Orgebes va Dostik qishloqlarida jami 631 ta xonadon suv ostida qolgan. Qutqaruv ishlariga 986 nafar xodim, 4 ta qayiq va yana 180 ta texnika jalb qilingan.

4-may kuni beshta qishloqda suv toshqini xavfi ortda qolgani xabar qilindi. Toshqin bo‘lish xavfi mavjud qishloqlar atrofida himoya to‘g‘onlari qurilmoqda. Nurli qishlog‘i esa kengligi 2,5 metr, balandligi esa 1,5 metr bo‘lgan himoya devori bilan o‘ralgan.

Dastlabki ma’lumotlarga ko‘ra suv toshqinidan 404 million tenge miqdorida zarar yetgan. Maqtaaral tumanidagi 85 foiz qismiga paxta ekilgan 3600 gektardan ko‘proq ekin maydoni suv ostida qolgan. Shuningdek, 6 ming bosh qoramol ham xavfsiz yerga evakuatsiya qilingan. Viloyat hokimligi ko‘rilgan zarar miqdori va boshqa sarf-xarajatlar qoplab berilishini ma’lum qilgan.