O‘zbekistonda 26-aprel, yakshanba kuni, koronavirusga chalingan bemorlarning 58 nafari tuzalib, reabilitatsiyaga jo‘natildi. Mamlakatda tuzalganlarning umumiy soni 765 nafarga yetdi. Bu haqda Sog‘liqni saqlash vazirligi xabar berdi.

Foto: Sog‘liqni saqlash vazirligi

Tuzalganlarning 50 nafari Buxorodan bo‘lib, ularning 23 nafari viloyat yuqumli kasalliklar shifoxonasidan, 27 nafari esa viloyat ko‘p tarmoqli tibbiyot markazidan sog‘ayib chiqqan.

Qayd etilishicha, ularning 43 nafari erkak, 7 nafari ayol bo‘lib, 44 nafari Rossiyadan, 6 nafari esa Turkiyadan charter reyslar orqali Buxoroga olib kelingan va karantinga olingan. Koronavirus infeksiyasi tasdiqlangach, ixtisoslashgan shifoxonaga joylashtirilgan.

Bemorlarning 9 nafari Samarqand viloyatidan, Buxoro va Qashqadaryo viloyatlaridan 8 nafardan, 5 nafari Andijon viloyatidan, Qoraqalpog‘iston Respublikasi va Namangan viloyatidan 4 nafardan, 3 nafar Toshkent shahridan bo‘lsa, Xorazm, Farg‘ona va Sirdaryo viloyatlaridan 2 nafardan, Jizzax, Toshkent va Surxondaryo viloyatlaridan 1 nafardan. Ular orasida eng yoshi kattasi 59 yoshda bo‘lsa, eng yoshi kichigi 5 yoshli qizaloq.

Toshkentda esa Epidemiologiya, mikrobiologiya va yuqumli kasalliklar ilmiy-tekshirish instituti klinikasida 5 nafar, Toshkent tibbiyot akademiyasi ko‘p tarmoqli klinikasida 1 nafar bemor butkul sog‘aygan.

Epidemiologiya, mikrobiologiya va yuqumli kasalliklar ilmiy-tekshirish instituti klinikasida tuzalganlarning 2 nafari Toshkent shahridan bo‘lsa, qolgan 3 nafari esa Sirdaryo, Surxondaryo va Toshkent viloyatidan. Ularning 2 nafari Moskva—Toshkent yo‘nalishida charter reys orqali kelgan. Qolgan 3 nafari koronavirus infeksiyasiga chalingan bemorlar bilan muloqot orqali kasallikni yuqtirib olgan. Bemorlardan 4 nafari erkak, 1 nafari ayol. Ular orasida eng yoshi kattasi 53 yoshda bo‘lsa, eng yoshi kichigi 26 yoshda.

Toshkent tibbiyot akademiyasi ko‘p tarmoqli klinikasida sog‘aygan 42 yoshli bemor (erkak) Toshkent shahridan bo‘lib, koronavirus infeksiyasiga chalingan bemorlar bilan muloqot orqali kasallikni yuqtirib olgan.

Shuningdek, poytaxtdagi 3-sonli tug‘ruq majmuasida ilk bor koronavirusga chalingan 2 nafar bemor: yaqinda farzandli bo‘lgan ona hamda homilador ayol ham sog‘ayib chiqqan.

Birinchi bemor ayol 38 yoshda bo‘lib, Namangan shahridan. 2020-yil 31-mart kuni Toshkent shahar perinatal markazida farzandli bo‘lgan. Onada koronavirus infeksiyasi aniqlangach, 3-sonli tug‘ruq majmuasiga olib kelingan. Uning farzandida esa koronavirus infeksiyasi aniqlanmagan.

Homilador ayol esa 28 yoshda bo‘lib, Samarqand shahridan. U 26-mart kuni Turkiyadan Toshkentga kelgan va karantinga olingan. Koronavirus infeksiyasi aniqlangach, 3-sonli tug‘ruq majmuasiga olib kelingan. Ayni paytda 32 haftalik homilasi rivojlanmoqda.

Shunday qilib, 26-aprel soat 17:50 holatiga ko‘ra, O‘zbekistonda koronavirus infeksiyasidan butunlay sog‘aygan bemorlar soni 765 nafarni tashkil etmoqda.

O‘zbekistonda 26-aprel soat 18:00 holatiga ko‘ra, koronavirus infeksiyasini yuqtirib olganlar soni 4 kishiga ko‘payib, 1869 nafarga yetdi.