Dorixonalarda narx sun’iy oshirilishi savdo yoki xizmat ko‘rsatish qoidalarini buzish hisoblanib, 1,5 million so‘mgacha jarima solishga yoki litsenziyaning bekor qilinishiga sabab bo‘lishi mumkin. Bu haqda Davlat soliq qo‘mitasi raisi o‘rinbosari Fazliddin Umarov 25-mart, chorshanba kuni, bo‘lib o‘tgan brifingda ma’lum qildi.

Foto: “Daryo”

Ma’lum qilinishicha, dori vositalari va tibbiy buyumlar ulgurji savdo uchun sotib olingan qiymatidan 15 foizdan, chakana savdo uchun esa ulgurji narxidan 20 foizdan ortiq bo‘lmagan miqdorda belgilanadigan savdo ustamalari qo‘llangan holda sotilishi lozim.

Qayd etilishicha, savdo yoki xizmat ko‘rsatish qoidalarini buzish dorixona rahbariga 1,5 million so‘mgacha jarima solishga sabab bo‘ladi. Bundan tashqari, bu holat dori vositalarini sotish huquqini beruvchi litsenziya bekor qilinishiga olib kelishi ham mumkin.

Eslatib o‘tamiz, O‘zbekistonda koronavirus tarqalishining oldini olish chora-tadbirlari doirasida yuz niqobilar qo‘shilgan qiymat solig‘idan ozod qilindi hamda ular tibbiy buyumlar ro‘yxatidan chiqarildi. O‘zbekistonda koronavirusni aniqlash bo‘yicha test tizimi ishlab chiqildi.