Коронавирус инфекцияси тарқалишининг олдини олиш бўйича жорий этилган тартиб муносабати билан Тошкент шаҳар ИИББ Марказий аппарати ва унинг ҳудудий бўлинмалари биноларида фуқаролар ва юридик шахслар вакилларининг қабуллари вақтинчалик тўхтатилди. Бу ҳақда ИИББ томонидан маълум қилинди.
Хабар берилишича, барча мурожаатлар электрон кўринишда электрон почта ҳамда Telegram боти орқали қабул қилинади.
Фуқаролар ва юридик шахслар ўз мурожаатларини Тошкент шаҳар ИИББнинг «info@iibb.uz» электрон манзилига, Миграция ва фуқароликни расмийлаштириш бошқармасининг Telegram’даги @passport_viza ботига ҳамда Йўл ҳаракати хавфсизлиги бошқармасининг «yhxb.iibb.uz» сайтидаги фуқаролар мурожаати рукни орқали жўнатиши мумкин.
Шунингдек, мурожаатлар +99871 2819334, +99871 2819418 телефон рақамлари ёки Ўзбекистон Республикаси Ички ишлар вазирлигининг 1102 «ишонч рақами» орқали қабул қилинади.
Маълум қилинишича, Тошкент шаҳар ИИББ ҳузуридаги Тергов бошқармаси ва унинг туман бўлинмалари терговчиларига жиноят иши бўйича тергов жараёни қатнашчиларини ички ишлар органларига фақатгина кечиктириб бўлмас тергов ҳаракатларини ўтказиш учун олиб келиши мумкин. Техник имкониятлар мавжуд бўлган тақдирда барча тергов ҳаракатлари Ўзбекистон Жиноят-процессуал кодекси талабларига мувофиқ видеоконференция тарзида, ички ишлар органларининг маъмурий биноларига жараён қатнашчилари бўлмаган шахсларни киритмаган ҳолда олиб борилади.
Қайд этилишича, ушбу вақтинчалик чекловлар Вазирлар Маҳкамасининг 2020 йил 23 мартдаги «Коронавирус инфекцияси тарқалишига қарши қўшимча чора-тадбирлар тўғрисида»ги қарори ва давлат санитария назорати органларининг тегишли тавсиялари ижросига мувофиқ жорий этилган.
Эслатиб ўтамиз, нотариуслар, Давлат хизматлари марказлари ва ФҲДЁ идоралари 25 мартдан онлайн иш режимига ўтди. Олий Мажлис Сенатининг 24 мартда бўлиб ўтган 3-ялпи мажлиси видеоконференцалоқа шаклида ўтказилди.
Изоҳ (0)