Hindistonda musulmonlarni kamsituvchi fuqarolik to‘g‘risidagi qonunga qarshi norozilik vaqtida noma’lum shaxs namoyishchilarga qarata o‘q uzdi
Hindiston poytaxti Nyu-Dehlida o‘tkazilayotgan fuqarolik to‘g‘risidagi qonunga qarshi norozilik namoyishida noma’lum shaxs namoyishchilarga qarata o‘q uzdi. Times of India’ning yozishicha, hodisa oqibatida bir talaba yaralangan va shifoxonaga yotqizilgan, o‘q uzgan shaxs esa Islom universiteti talabalari ko‘magida qo‘lga olingan.
Hindiston parlamenti tomonidan fuqarolik to‘g‘risidagi qonunga kiritilgan tuzatishlarga muvofiq, Afg‘oniston, Pokiston va Bangladesh kabi qo‘shni mamlakatlardan qochib kelgan musulmon bo‘lmagan shaxslar, agar ular o‘z vatanlarida tahqirlashlarga uchrayotgan bo‘lsa, Hindiston fuqaroligini soddalashtirilgan tartibda olishi mumkin.
Police watch as a guy waves a gun outside Jamia University. Man says "Yeh lo azaadi." This week a minister chanted - desh ke gaddaron ko, goli Maro saalon ko. pic.twitter.com/19mfHvFcQR
— Niha Masih (@NihaMasih) January 30, 2020
Ushbu qonun hindistonlik musulmonlarning noroziligiga sabab bo‘ldi — ularning fikricha, so‘nggi tuzatishlar konstitutsiyaga zid, chunki rasman dunyoviy hisoblangan mamlakatda aholining bir qismi diniy e’tiqodidan kelib chiqib kamsitilmoqda. Hindiston shimoli-sharqiy shtatlari aholisi ham qonunga e’tiroz bildirgan — endi ular Bangladeshdan kelgan millionlab odamlar ularning shtatlarida doimiy qolib ketishidan xavotirda. Bu holat norozilik namoyishi ishtirokchilarining fikricha, mahalliy aholi manfaatlariga zid.
Muxolifat vakillarining fikricha, tuzatishlar kiritilgan qonun kamsituvchi mazmunga ega, chunki — mamlakat aholisi (1,3 milliard kishi)ning 10 foizdan ko‘prog‘i islom diniga e’tiqod qilayotgan bir vaqtda — musulmonlarning fuqarolik olish imkoniyatlarini cheklaydi. Tanqidchilarning ta’kidlashicha, bunday sharoitda diniy e’tiqod fuqarolik olish uchun shartga aylanmasligi lozim.
Hindiston Oliy sudi 22-yanvar kuni fuqarolik to‘g‘risidagi qonunning amal qilishini to‘xtatib turishni rad etgan va ushbu qonun bo‘yicha petitsiyaga javob qaytarish uchun hukumatga to‘rt hafta muhlat bergan edi.
