“Ozodlik” radiosining ijtimoiy tarmoqdagi sahifalarida “Hozircha maxfiy: taqiqlangan diniy adabiyot, sayt va tashkilotlarning yangi ro‘yxati tasdiqlandi” nomli maqola e’lon qilindi. Din ishlari bo‘yicha qo‘mita matbuot xizmati mazkur maqolaga munosabat bildirdi.
Vazirlar Mahkamasining 2014-yil 20-yanvardagi “Diniy mazmundagi materiallarni tayyorlash, olib kirish va tarqatish sohasidagi faoliyatni amalga oshirish tartibini takomillashtirish chora-tadbirlari to‘g‘risida”gi 10-son qarori asosida tasdiqlangan nizomda: “Vakolatli organ yiliga kamida ikki marta manfaatdor vazirliklar va idoralarga O‘zbekiston Respublikasi hududida tayyorlash, olib kirish va tarqatish taqiqlangan materiallar ro‘yxatini taqdim etadi”, deyilgan.
Shunga ko‘ra, vakolatli organ, ya’ni Din ishlari bo‘yicha qo‘mita tomonidan yiliga kamida ikki marta manfaatdor vazirliklar va idoralarga O‘zbekiston Respublikasi hududida tayyorlash, olib kirish va tarqatish taqiqlangan materiallar ro‘yxati taqdim etiladi. Bu 2014-yildan buyon amalda bo‘lib kelayotgan huquqiy jarayon.
Davlat dinshunoslik ekspertizasi Vazirlar Mahkamasining 2014-yil 20-yanvardagi 10-sonli qaroriga muvofiq, vakolatli organ bo‘lgan Din ishlari bo‘yicha qo‘mita tomonidan amalga oshiriladi. Mazkur qarorda O‘zbekiston Respublikasi hududiga chetdan olib kiriladigan hamda respublika hududida ishlab chiqariladigan diniy mazmundagi materiallar davlat dinshunoslik ekspertizasidan o‘tkazilishi lozimligi belgilab qo‘yilgan.
Din ishlari bo‘yicha qo‘mita ekspert-mutaxassislari tomonidan amalga oshiriladigan davlat dinshunoslik ekspertizasi amaliyoti o‘zida xorijdan olib kirilayotgan va mamlakatda tayyorlanadigan diniy materiallarda sof diniy aqidalardan og‘ishganlik, din asoslarini noto‘g‘ri talqin etish, dinlararo adovat va nafrat qo‘zg‘atish kabi nomaqbul maqsadlarda foydalanish va ilmiy asosga ega bo‘lmagan ma’lumot va talqinlarga yo‘l qo‘yilmasligini ta’minlashni ifoda etadi.
Mutaxassislar tomonidan har bir tadqiqot obyektiga nisbatan xolis va ilmiy asoslanganlik nuqtai nazardan yondashilib, har bir xulosa materialning mazmunidan kelib chiqqan holda shaffof tarzda tayyorlanadi.
Shuningdek, amaliyotda taqdim etilishi lozim bo‘lgan ushbu ro‘yxat “maxfiy” emas, balki xizmat doirasida foydalaniladigan hujjat hisoblanadi.
“Bu kabi xabarlarni tarqatishdan oldin huquqiy manbalarni sinchkovlik bilan o‘qib chiqish maqsadga muvofiq ekanini aytib o‘tmoqchimiz”, — deyiladi munosabatda.
Izoh (0)