OCh—2020. Bugun O‘zbekiston olimpiya terma jamoasi guruh bosqichining hal qiluvchi bahsida ishtirok etadi

Tailand mezbonlik qilayotgan U23 Osiyo chempionati—2020 musobaqasining 3-tur uchrashuvlari 15-yanvar, chorshanba kuni davom ettiriladi.

C guruhidan o‘rin olgan O‘zbekiston olimpiya terma jamoasi guruh bosqichining so‘nggi turida Janubiy Koreyaga qarshi bahs olib boradi. Parallel ravishda Xitoy va Eron terma jamoalari o‘rtasida guruhning ikkinchi o‘yini bo‘lib o‘tadi.

Bankok yaqinidagi “Tammasat” stadionida bo‘lib o‘tadigan uchrashuv Toshkent vaqti bilan 15:15 da start oladi. O‘yin “Sport” telekanali orqali jonli efirga uzatilishi reja qilingan.

Mazkur uchrashuvda qo‘lga kiritilgan har qanday ochko Lyubinko Drulovich shogirdlarini keyingi bosqichga olib chiqadi. Janubiy Koreya ustidan qozonilgan g‘alaba esa O‘zbekistonga birinchi o‘rinni taqdim etadi.

Shuningdek, B guruhi vakillari ham 3-tur bahslariga kirishadi. Saudiya Arabistoni Suriya bilan o‘ynasa, guruhdan chiqish imkoniyatini yo‘qotgan Yaponiya qatarliklarga qarshi uchrashuv o‘tkazadi.