Shuhrat G‘aniyev Farg‘ona viloyati hokimi etib tasdiqlandi
2020-yil 13-yanvar kuni oltinchi chaqiriq Xalq deputatlari Farg‘ona viloyati kengashining birinchi sessiyasi bo‘lib o‘tdi. Unga 57-Hamid Olimjon saylov okrugidan saylangan deputat Topivoldi Xoldorov raislik qildi. Bu haqda viloyat hokimligi axborot xizmati xabar berdi.
Sessiya ishida viloyat kengashi deputatlari, viloyat hokimining o‘rinbosarlari, viloyat hokimligining boshqarma va bo‘limlari rahbarlari, shahar va tuman hokimlari, huquqni muhofaza qiluvchi organlar rahbarlari hamda ommaviy axborot vositalari vakillari qatnashdi.
Shuningdek, sessiyada O‘zbekiston Respublikasi Prezidenti vakili, Bosh vazirning birinchi o‘rinbosari Ochilboy Ramatov ishtirok etdi.
Dastlab Xalq deputatlari Farg‘ona viloyati kengashiga o‘tkazilgan saylov natijalari haqida axborot berish uchun viloyat saylov komissiyasi raisi Erkin Nuraliyev so‘z oldi. U 60 nafar saylangan deputat maqomini tasdiqladi.
Xalq deputatlari Farg‘ona viloyati kengashining 7 ta doimiy komissiyasi tuzildi.
Kun tartibidagi tashkiliy masala – O‘zbekiston Respublikasi Prezidenti tomonidan Farg‘ona viloyati hokimi lavozimiga taqdim etilgan nomzodni tasdiqlash yuzasidan Ochilboy Ramatov so‘zga chiqdi.
U O‘zbekiston Respublikasi Prezidenti tomonidan Farg‘ona viloyati hokimi lavozimiga 2-Mirzo Ulug‘bek saylov okrugidan saylangan deputat Shuhrat G‘aniyev nomzodini Xalq deputatlari viloyat kengashi sessiyasida tasdiqlash to‘g‘risida taqdimnoma kiritilganligini bildirdi va o‘qib eshittirdi.
Ushbu taqdimnoma muhokamasida deputatlik guruhlari vakillari so‘zga chiqdi va Farg‘ona viloyati hokimligiga tavsiya etilgan nomzodni qo‘llab-quvvatladi. Shuhrat G‘aniyev Farg‘ona viloyati hokimi etib bir ovozdan tasdiqlandi.
Sh.G‘aniyev bildirilgan yuksak ishonch uchun O‘zbekiston Prezidenti va Xalq deputatlari Farg‘ona viloyati kengashi deputatlariga minnatdorlik bildirdi. Bor kuch va bilimini safarbar qilib, fidoyilik va sadoqat bilan xizmat qilishga va’da berdi.
