O‘zbekistonda 22-dekabr kuni bo‘lib o‘tgan parlament saylovlarida mamlakatda ro‘yxatga olingan besh partiyadan to‘rttasining yetakchisi bir urinishda Oliy Majlis Qonunchilik palatasi deputatligiga saylandi. Bu haqda partiyalarning vakillari “Daryo” muxbiriga ma’lum qildi.
Xususan, Liberal-demokratik partiya yetakchisi Aktam Hayitov 136-Dehqonobod saylov okrugi (Qashqadaryo)dan, Xalq demokratik partiyasi yetakchisi Ulug‘bek Inoyatov 53-Yangiqo‘rg‘on saylov okrugi (Namangan viloyati)dan, Ekologik partiya yetakchisi Boriy Alixonov 39-Qiziltepa saylov okrugi (Navoiy viloyati)dan, “Adolat” sotsial-demokratik partiyasi yetakchisi Narimon Umarov esa 82-Sho‘rchi saylov okrugi (Surxondaryo viloyati)dan saylangan.
Faqat “Milliy tiklanish” demokratik partiyasi yetakchisi Alisher Qodirov saylovchilarning 50 foiz ovozini to‘play olmay, ovoz berish jarayonining ikkinchi turiga o‘tgan. Oliy Majlis Qonunchilik palatasiga uning nomzodi 36-Paxtakor saylov okrugi (Jizzax viloyati)dan ko‘rsatilgan edi. Qayd etish joiz, Qodirov “Sof.uz” nashriga bergan intervyusida deputatlikka saylanganini ta’kidlagan.
“Ha, deputatlikka saylandim. Kechasi 00:30 dagi ma’lumotlarga ko‘ra, 70 foiz atrofida ovoz olgan edim. Lekin hali to‘liq o‘rganilmadi. Raqiblarga qaraganda farq kattaligi uchun men deputatlikka o‘tdim deya ishonch bilan ayta olaman”, — deb aytgan “Milliy tiklanish”. Ayni vaqtda @davletovuz kanalida e’lon qilingan hisobotda Jizzax viloyatidagi jami olti saylov okrugidan faqat bittasida deputat saylangani (qolganlarida ikkinchi tur bo‘ladi), u ham Xalq demokratik partiyasi (O‘zXDP) vakili ekani ko‘rsatilgan.
Ma’lumot uchun, Oliy Majlis Qonunchilik palatasiga saylovning dastlabki natijalariga ko‘ra, O‘zLiDeP 43 ta, “Milliy tiklanish” 35 ta, “Adolat” 21 ta, O‘zXDP 18 ta, Ekologik partiya esa 11 ta deputatlik o‘rnini qo‘lga kiritgan. 22 ta okrugda saylovning ikkinchi turi o‘tkaziladi. “Milliy tiklanish” partiyasi yetakchisi Alisher Qodirovning so‘zlariga ko‘ra, 15 ta okrugda partiya nomzodlari ikkinchi turga o‘tgan.
