16-dekabr, dushanba kuni Andijon tumanidagi avtomashinalarga gaz quyish shoxobchalarining birida Nexia-2 rusumli avtomashinaning orqa yukxonasiga o‘rnatilgan gaz baloni portlagan edi. IIV huzuridagi Tergov departamenti ushbu portlash sabablarini ma’lum qildi.
O‘tkazilgan tergovga qadar tekshiruv jarayonida aniqlanishicha, ushbu avtomashina gaz quyish uchun “Jahonobod” mahallasida joylashgan avtomobillarga gaz quyish shoxobchasiga kirib kelgan.
Gaz quyib bo‘lganidan so‘ng chiqib ketmoqchi bo‘lganida bir vaqtning o‘zida avtomashinaning oldi va orqa qismida gaz-havo aralashmasining chaqnashi oqibatida portlash sodir bo‘lgan. Portlash natijasida avtomashina jiddiy shikastlangan, haydovchi esa dvigatel qismida shovqin ovozini eshitganligi sababli zudlik bilan transport vositasini tark etgan va yengil tan jarohati olgan, boshqa jarohatlanganlar yo‘q. Portlash sabablarini aniqlash maqsadida hodisa joyidan portlagan gaz balonning qoldiqlari tegishli tartibda rasmiylashtirib olingan.
Mazkur holat yuzasidan Andijon tumani IIB huzuridagi tergov bo‘limi tomonidan tergovga qadar tekshiruv harakatlari olib borilmoqda, tegishli ekspertizalar tayinlangan.