320 kg tosh bosgan erkak bir yilda ortiqcha vaznining uchdan ikki qismini yo‘qota oldi

Avstraliyaning Sidney shahrida yashovchi 320 kilogramm vaznga ega erkak fastfud yeyishni to‘xtatib, bir yil ichida 2 sentnerga ozdi. Bu haqda Daily Mail xabar berdi.

41 yoshli Endryu Zed zararli ovqatlarga sakkiz yil avval mukkasidan ketgan. Yigitning vazn to‘plash jarayoni rafiqasi bilan ajrashishi va biznesda kasodga uchrashi oqibatida boshlangan. Endryuning aytishicha, u har kuni kruassani, bekon, rulet, pitssa, tovuq, sarimsoqli non, kartofel fri, pasta, muzqaymoq va litrlab alkogolsiz ichimliklarni iste’mol qilgan. Shuningdek, ko‘p vaqtini uyquga va videoo‘yinlar o‘ynashga sarflagan.

Shifokorlar bunday hayot tarzi o‘limga olib borishi haqida ogohlantirgan.

“Shifokor bir yil ichida krovatdan tura olmaydigan darajada semirib ketishimni aytgan. Ushbu vaziyatga juda yaqin qolgandi. Bu ketishda halok bo‘lishim tayin edi. Iste’mol qilayotgan ovqatlarim tufayli vafot etishim mumkinligini o‘ylasam, yuragim orqaga tortardi”, — deydi Zed.

Avstraliya fuqarosi shunday kunlarning birida kutilmaganda Tailand dasturi asosida ozish haqidagi ma’lumotni o‘qib qoladi. Unga ikki oyga mo‘ljallangan oziq-ovqat iste’moli rejasini yuborishadi va sal ozib Chiangmay shahriga kelishni so‘rashadi. Shaharga kelgach, 2018-yil avgust oyida uning vazni 265 kilogrammga tushdi.

“Ular jismoniy mashqlarga emas, balki ovqatlanishga asosiy e’tiborni qaratardi”, — deb eslaydi Endryu.

Ozuvchilar uchun dastur loyihasi rahbarlaridan biri bo‘lgan Stiv Smit ushbu rejada zo‘riqishlar yo‘qligi va xordiq chiqarib ozish mumkinligini ta’kidlagan.

“Tana va ong jismoniy hamda ruhiy talvasa, ya’ni stressdan holi bo‘lgan holatda ozish ancha oson kechadi”, — deydi Smit.

Zed 2018-yilning dekabrida Avstraliyaga qaytgan va jarrohlik stoliga yotib oshqozonini bandajlagan. Biroq ushbu jarayon ham keragicha natija ko‘rsatmaganidan keyin yana Tailandga qaytib dastur asosida ozishni davom ettirgan.

Tailandcha dasturga ko‘ra, Zed 12 oy ichida 201 kilogramm ortiqcha vazndan xalos bo‘ldi.

“Ular mening yaxshi dam olishim haqida qayg‘urardi… Suv havzasida cho‘milardim, kitob o‘qirdim, seriallar tomosha qilardim, mahalliy turistik maskanlarni aylanardim, shirin ovqatlarni yerdim va vazn tashlardim, katta yukdan qutulishda davom etardim”, — deya ozishi qanday kechganini so‘zlab bergan Avstraliya fuqarosi.

Ozganidan keyin Zed yana ham quvnoq, bardam va o‘ziga ishongan insonga aylandi va uylanishga ham ulgurdi. Endi u yana 85 kilogramm ortiqcha vaznidan xalos bo‘lmoqchi.