Polsha Buyuk Britaniyadan 100 tonna oltinini olib chiqib ketgan
Polsha milliy banki Buyuk Britaniyadan 100 tonna oltinni olib chiqib ketish bo‘yicha katta hajmdagi operatsiyani o‘tkazdi. Oltinlar 1939-yilda Ikkinchi jahon urushi boshlangan vaqtda Britaniyaga yuborilgandi. Polyaklarning xazinani qaytarish operatsiyasi maxfiy ravishda o‘tgan, deb yozmoqda RMF24.
O‘tkazmani amalga oshirishga bir necha ming odam jalb qilingan, asosan banklar xavfsizlik xizmati xodimlari katta hajmdagi ishni bajargan. Quyma oltinlar noyabr oyi davomida samolyotlarda Polshaga tashilgan va Varshava hamda Poznanidagi aeroportlarga olib kelingan.
Aeroportga keltirilgan yuklar moviy rangdagi yuk mashinalarda o‘nlab harbiylar himoyasi ostida Polsha oltin zaxirasiga qo‘shib qo‘yilgan. Yukning umumiy hajmi taxminan 4,2 milliard yevroga baholanmoqda. Mablag‘ning muayyan qismi Angliya markaziy bankining joriy harajatlari uchun ushlab qolingan.
Polsha oltinni urush davrida Angliyaga Ukraina, Ruminiya, Turkiya, Suriya, Livan va Fransiya orqali olib o‘tgan va oltin qariyb 80 yil inglizlarda saqlangan.
2019-yilning iyul oyi holatiga Polshaning oltin zaxirasi 228,6 tonnani tashkil qiladi. Mamlakat bu borada Yevropada 11, butun dunyoda esa 22-o‘rinda turadi.
