Shavkat Mirziyoyev Captiva sovg‘a qilgan tojikistonlik dehqon Kamol hoji Madumarov vafot etdi

Tojikistonning Tursunzoda tumanida 3-oktabr kuni mamlakatda va mintaqdagi taniqli uzum yetishtiruvchi dehqon Kamol hoji ota Madumarov 80 yoshida vafot etdi. Tojikiston prezidenti Emomali Rahmon dehqonning o‘limi munosabati bilan uning qarindoshlari va yaqinlariga ta’ziya izhor qildi. Bu haqda Tojikiston respublikasi prezidentining rasmiy sayti xabar bergan.

“Kamol Madumarov samarali mehnat faoliyati davomida mamlakat qishloq xo‘jaligining rivojlanishiga munosib hissa qo‘shgan, u ayniqsa bog‘dorchilik va uzumchilik yo‘nalishida bor tajribasi hamda bilimini vatan ravnaqi uchun safarbar etgan inson edi”, — deyiladi xabarda.

Tursunzoda tumanidagi aka-uka fermerlar Kamol hoji hamda Ne’mat hoji Madumarovlar bo‘sh yotgan yerda 600 gektar maydonda uzumzorlar barpo qilib, “Bog‘i somon” nomli bog‘da 10 dan ortiq uzum navlarini yetishtirgan va Tojikistonning eng taniqli insonlari qatorida qayd etiladi.

Davlat rahbari Emomali Rahmon bir necha bor ushbu dehqon xo‘jaligida ko‘p bora mehmon bo‘lgan va u yerga O‘zbekiston Respublikasi prezidenti Shavkat Mirziyoyev hamda Belarus prezidenti Aleksandr Lukashenko bilan ham tashrif buyurgan.

Shavkat Mirziyoyev 2018-yilda dehqon xo‘jaligiga tashrifi chog‘ida asli oltiariqlik usta dehqon farzandi Kamol hoji Madumarovga Captiva avtomobilini sovg‘a qilgandi.