Trampning O‘zbekistonga tashrifi rejalashtirilmagan. Ammo kutilmagan o‘zgarishlar bo‘lishi mumkin — AQSh elchisi

AQShning O‘zbekistondagi yangi elchisi Deniyel Rozenblyum prezident Donald Trampning O‘zbekistonga tashrifi ehtimoliga izoh berdi. Bu haqda “Podrobno.uz” xabar berdi.

“Bilishimcha, AQSh prezidenti yoki vitse-prezidentining O‘zbekistonga tashrifi bo‘yicha rejalar yo‘q. Biroq barchasi kutilmaganda o‘zgarishi mumkin. Men AQSh prezidenti tashrifidan faqat xursand bo‘lardim. Dunyoning ko‘pgina davlatlarida inqiroz kuzatilmoqda va afsuski, rahbarimizning e’tibori ularga qaratilgan”, — degan u Toshkentda bo‘lib o‘tgan matbuot anjumanida.

Elchi, shuningdek, O‘zbekistonga tashrif buyurishning uchta sababni keltirib o‘tgan.

“Birinchisi, mamlakat, millatning nihoyatda boy tarixi, shuningdek, fan, san’at va arxitektura borasidagi mashhur ishlar. Ikkinchisi — menga o‘zbek taomlari juda yoqadi. Uchinchisi — juda mehmondo‘st va samimiy xalq. Ammo O‘zbekistonga tashrif buyurish uchun uch emas, undan ancha ko‘p sabablarni keltirib o‘tishim ham mumkin”, — deb ta’kidlagan Rozenblyum.