Vazirlik tarqatgan ma’lumotga ko‘ra, “Quvvat” animatsion filmning navbatdagi seriyasi bolalarga avtomobillarda benzin o‘rniga gazdan foydalanishning sabablarini o‘rganishga yordam beradi, O‘zA xabar qiladi.

Foto: O‘zA

O‘zbekistonda mashhur bo‘lgan mazkur multserial Energetika vazirligi va “O‘zbekneftgaz” aksiyadorlik jamiyati ko‘magida yaratilmoqda. Bu ijod mahsulining bosh qahramonlari — Tohir va singlisi Zuhra bo‘lib, filmdagi sarguzashtlarda ularning Karamelka laqabli mushukchasi ham ishtirok etadi.

Multfilmning keyingi seriyasida Tohir xuddi haqiqiy trassalarda o‘tkaziladigan poygalardek, o‘yinchoq avtomobillar poygasini tashkillashtirish fikriga qiziqib qoladi. Mashinalar poygasiga bo‘lgan qiziqish nafaqat g‘alabaga, balki yangi bilimlarni egallashga ham yetakladi. Qiziquvchan bolakay singlisidan haqiqiy mashinalar tezligini oshirishda benzindan tashqari, tabiiy gazdan ham foydalanish mumkinligini bilib oldi.

Foto: O‘zA

Robot bolalarga faqatgina gazning afzalliklari haqida ma’lumot beribgina qolmay, balki har qanday murakkab uskunalar kabi gaz uskunalarini ham o‘z vaqtida tekshirib turish va texnik ko‘rikdan o‘tkazib turish lozimligini tushuntiradi. Aynan shundagina avtomobilda gazdan foydalanish faqat foyda keltiradi.

“Quvvat” multseriali yana bir bor bolalarga, shuningdek, ularning ota-onalariga kundalik hayotimizda muhim ahamiyat kasb etuvchi tabiiy resurslar bilan bog‘liq juda kerakli, muhim ma’lumotlarni sodda va qiziqarli tarzda hikoya qiladi.