18-iyun kuni Samarqand viloyati Urgut va Samarqand tumanlaridagi “Uchqun” hamda Mudofaa vazirligiga qarashli Ya. Tursunov nomidagi sog‘lomlashtirish oromgohlarida harbiylar tomonidan ko‘rgazmali chiqishlar namoyish etildi. Bu haqda Markaziy harbiy okrug matbuot xizmati ma’lum qildi.
Dam olish maskani Jizzax, Samarqand, Navoiy viloyatlaridan (112 nafar) hamda Surxondaryo, Buxoro va Qashqadaryodagi shaharlardan (67 nafar) harbiy xizmatni o‘tayotgan va xizmat burchini bajarish vaqtida halok bo‘lgan harbiylarning jami 179 farzandi imtiyozli yo‘llanma asosida ta’til kunlarini maroqli o‘tkazmoqda.
Yoshlar 14 kunlik yozgi dam olish oromgohida yetti guruhga bo‘lingan va ular bilan kun tartibida belgilangan vaqtlarda ko‘ngilochar tadbirlar, sport musobaqalari hamda tog‘ sayllari o‘tkazilyapti.
Oromgohga Samarqand shahrida Uzoq lager dahasida joylashgan harbiy qismdan kelgan serjantlar bolalar uchun tashkil etilgan shaxmat, shashka, raqs, rasm chizish, futbol hamda kitob mutolaasi bo‘yicha mashg‘ulotlarni kuzatdi.
Oromgohga bolalar 16-iyun kuni kelib joylashgan edi.
Ma’lumot uchun, harbiy xizmatchilarning farzandlari uchun imtiyozli yo‘llanmaning umumiy narxi 852 677 so‘mni tashkil etadi. Ushbu summaning 70 foizi Mudofaa vazirligi tomonidan to‘lab beriladi, 255 803 so‘m (30 foizi) esa ota-onalar tomonidan to‘lanadi.
Izoh (0)