Toshkent shahar hokimligi inson huquqlari bo‘yicha faollar, xorijiy diplomatlar bilan uchrashuvda hokimlik vakillari ishtirok etmaganligi sababini ma’lum qildi

rasmiy axborot e’lon qilib, inson huquqlari bo‘yicha faollar, xorijiy diplomatlar bilan uchrashuvda hokimlik vakillari ishtirok etmaganligi sababini ma’lum qildi.

“Ommaviy axborot vositalarida 15-aprel kuni hokimlik mas’ullari bilan muloqot qilmoqchi bo‘lgan inson huquqlari bo‘yicha faollar, xorijiy diplomatlar bilan uchrashuvda hokimlik vakillari ishtirok etmaganligi haqida axborot tarqatilgan.

Uchrashuvga 12-aprelda yozilgan taklif xati hokimlik kanselyariyasiga 15-aprel kuni ertalab tashlab ketilgan. Hokimiyat ish Reglamentiga ko‘ra, kun davomida qabul qilib olingan murojaat va takliflar hamda boshqa xat-hujjatlar ro‘yxatga olinib, tegishli mas’ullar belgilanib, hokimning kotibiyatiga yo‘naltiriladi. Yig‘ilgan korrespondensiya kun oxirida tegishli topshiriq va javoblarni olish uchun hokimga taqdim etiladi. Shuni inobatga olgan holda uchrashuv bo‘yicha taklifni 3—4 kun oldin jo‘natish maqsadga muvofiq bo‘lar edi. Yo‘llangan xatning uslubi ham jiddiy yondashuvga undaydigan tarzda bitilmaganini uning quyidagi nusxasidan ham bilib olsa bo‘ladi.

Shahar hokimining ish rejasi oldindan belgilanishini hisobga olib, tashkilotchilar uchrashuv kunini hokimiyat mas’ullari bilan oldindan muvofiqlashtirganda, hozirgi vaziyatga o‘xshagan tushunmovchilik ro‘y bermas edi.

Bundan tashqari, xat “Gumanitar huquq markazi” direktori tomonidan imzolagan bo‘lib, unda tashkilotning aniq manzili, telefon raqami yo‘qligi sabab, uning faoliyati qonuniy yoki noqonuniy ekanligini aniqlashning imkoni yo‘q. Xatda yozib qoldirilgan raqam orqali ham uchrashuv va uning tashkilotchisi haqida to‘liq ma’lumot olishning iloji bo‘lmadi. Uchrashuv tashabbuschilariga keyingi safar puxtaroq tayyorgarlik ko‘rishni tavsiya qilgan bo‘lardik. Zeroki, shahar hokimining noma’lum tashkilot uyushtirayotgan noma’lum uchrashuvga zudlik bilan yetib borishining ehtimoli juda past.

Toshkent shahar hokimiyati muloqot uchun ochiqligini ma’lum qilgan holda inson huquqlari bo‘yicha faollar, xalqaro tashkilotlar va diplomatik korpus vakillari bilan tegishli mavzularda hamkorlik qilishga, birgalikda mavjud muammo va kamchiliklarni bartaraf etishga tayyorligini bildiradi. Aynan shu mavzularni birgalikda o‘rganib chiqish va muhokama qilish uchun, shahar hokimi avval ham aytganidek, uchrashuv tashkil etilishi rejalashtirilgan. Uning aniq tafsiloti haqida shahar hokimiyati matbuot xizmati qo‘shimcha xabar beradi.

Dezinformatsiya va shoshilinch xulosalarning oldini olish maqsadida ommaviy axborot vositalari, bloger va jurnalistlarni ular qiziqqan mavzularda o‘zaro aloqaga chiqib, muloqot qilib, vaziyatning ikkinchi tomonini ham o‘rganishga, jamoatchilikka aniq ma’lumotlar tarqatishga, xolis yondashuvga va beg‘araz hamkorlikka chaqiramiz”, — deyiladi hokimlik xabarida.