Rossiya muftiylar Kengashi raisi Ravil Gaynutdin 2034-yilga borib Rossiyada musulmonlar soni mamlakat aholisining 30 foizigacha ko‘payishini ma’lum qildi. Bu haqda “Interfaks” xabar berdi.

Foto: “RIA Novosti”

Muftiyning so‘zlariga ko‘ra, bunday bashoratlar amaliyotda sinalgan. Bundan tashqari u ekspertlar fikrini ham qayd etgan.

Gaynutdin o‘z bayonoti bilan Davlat Dumasidagi “Rossiyada islom tarixi: kelajakka qarashni tushunish” ilmiy-amaliy konferensiyasida nutq so‘zlagan.

Oila, onalik va bolalikni muhofaza qilish bo‘yicha patriarx komissiyaning raisi Dimitriy Smirnov ham uning fikriga qo‘shilgan. “Govorit Moskva” radiostansiyasiga bergan intervyusida, ruslar “2050-yilga qadar tugaydi” degan. Uning fikriga ko‘ra, bu etnik musulmonlar Rossiyadagi boshqa xalqlarga qaraganda “ko‘proq farzand ko‘rishi” bilan bog‘liq.

2018-yilda Rossiya prezidentining Shimoliy Kavkaz federal okrugidagi vakili Aleksandr Matovnikov islomni qabul qilgan rossiyaliklarning soni haqida o‘z xavotirini bildirgan. Uning aytishicha, olti oy ichida mingdan ortiq kishi islomni qabul qilgan. Uning fikricha, islom dinini yangi qabul qilganlar ko‘pincha “ekstremistik va terroristik mafkuraning eng motivatsion va fanatik tarafdorlari” bo‘ladi.

2002-yilgi aholini ro‘yxatga olish ma’lumotlariga ko‘ra, Rossiyada an’anaviy musulmonlar soni 14,5 millionga yaqin edi. Rossiyaning aholisi 2017-yilda 144,5 millionga yetgan.