Tennesi shtatining Uilyamson okrugidagi maktab o‘quvchilarga oilasida qul saqlayotganini tasavvur qilib, ularga buyuriladigan ishlar ro‘yxatini tuzish topshirig‘ini bergani uchun uzr so‘radi, deb yozadi Forum Daily.
O‘qituvchilar qullik, immigratsiya va bolalar mehnati masalalari ko‘tarilgan yozma topshiriqni 27-fevral kuni bergan. Sakkizinchi sinf o‘quvchilari o‘z oilalarida qul saqlanayotganini tasavvur qilishi va ularga buyuriladigan ishlar ro‘yxatini tuzishi kerak bo‘lgan.
Shunday uy vazifani olgan 13 yoshli o‘quvchining opasi Den Fonteyn o‘qituvchi vazifani tushuntirmagani va unda irqchilik va immigratsiya mavzusi ko‘tarilganini qayd etmaganini aytgan.
“Avvaliga bundan jahlim chiqdi. Singlim maktabdagi qora tanli o‘quvchilardan biri ekanligini hisobga olgan holda, men bunday narsalarga yo‘l qo‘ymayman. Bunday topshiriq akademik qimmatga ega emas”, — degan u.
Tennesi shtati Ta’lim vazirligi ma’lumotlariga ko‘ra, Brentvudda joylashgan Sanset o‘rta maktabining 70 foiz o‘quvchilari oq tanli hisoblanadi.
O‘quvchilarga berilgan uy vazifasida, shuningdek, plantatsiya egalari va ularga qul bo‘lgan aholi hayotini solishtirish topshirig‘i ham berilgan.
O‘qituvchilar Syuzen Xuper va Kim Best, shuningdek, Sanset maktab direktori Tim Braun ham bunday noma’qul vazifa berilgani uchun maktab o‘quvchilari va ularning ota-onalaridan uzr so‘ragan.
Izoh (0)