Dunyoning eng boy odami — Amazon kompaniyasi asoschisi Jeff Bezos rafiqasi Makkenzi Bezos bilan ajrashayotganini ma’lum qildi. Bu haqda milliarder Twitter’da yozgan, deb xabar berdi “Vedomosti”. Bezosning qo‘shimcha qilishicha, er-xotin ancha vaqtdan buyon birga yashamayapti.

Foto: TJournal

Biznesmen Twitter’da rafiqasi bilan qo‘shma bayonotni e’lon qilgan. Xabarda qayd etilishicha, ular ajrashganidan so‘ng qo‘shma loyihalarda va investitsiyalarda hamkorlik qilishda davom etadi.

Jeff Bezos va Makkenzi 1992-yilda tanishgan. Juftlik 1993-yilda turmush qurgan, ularning to‘rt nafar farzandi bor. 2017-yilda ular Day One Fund qo‘shma xayriya jamg‘armasini tuzgan.

2018-yilning mart oyida Forbes milliarderning boyligini 112 milliard dollarga baholagan. 7-yanvar kuni Amazon bozor kapitalizatsiyasi bo‘yicha Apple’ni ortda qoldirdi va dunyodagi eng qimmat kompaniyaga aylandi. Amazon’ning bozor kapitalizatsiyasi 796 milliard dollarni tashkil qilmoqda.