Farg‘ona viloyati hokimi tadbirkorlar bilan uchrashuv o‘tkazdi
Bugun, 21-dekabr kuni Farg‘ona shahridagi “Tadbirkorlar markazi”da viloyat hokimi Shuhrat G‘aniyev 500 dan ortiq tadbirkorlar bilan uchrashdi. Bu haqda Farg‘ona viloyati Davlat soliq boshqarmasi axborot xizmati xabar berdi, deb yozadi “Xalq so‘zi”.
Mazkur seminar soliq siyosatini takomillashtirish konsepsiyasi mazmun-mohiyatini yana bir bor tadbirkorlarga yetkazish, ular bilan fikr almashish maqsadida Farg‘ona viloyati Davlat soliq boshqarmasi tomonidan tashkil etildi.
Tadbirni ochib bergan Shuhrat G‘aniyev 1990-yillardagi o‘zining tadbirkorlik faoliyati bilan o‘rtoqlashib, u paytlardagi tadbirkorlik muhiti bilan bugungi kundagisining yer-u, osmoncha farqi borligini, yangi loyihalar yaratayotganga darvozalar keng ochilayotganligini ta’kidladi. Shuningdek, viloyatda tadbirkorlarni gazeta va jurnallarga majburiy obuna qilinishiga yo‘l qo‘yilmayotganligini, agar u o‘qimishli bosma nashr bo‘lsa, gazetxon uni o‘zi topib o‘qishini alohida qayd etdi.
Bundan tashqari, ayni paytda tadbirkorlik bilan shug‘ullanish, qo‘shimcha ish o‘rinlari yaratish davr talabi ekanligi, viloyat hokimi hatto o‘zi ham uzum eksporti bilan shug‘ullanishini haqida o‘rtoqlashdi. Shu bilan birga, viloyatda kuni kelib yillik tovar aylanmasi 20-30 million AQSh dollari bo‘lgan tadbirkorlar soni ortishiga ishonchi komilligini ta’kidladi.
Tadbirda ma’ruzachilar tomonidan soliq siyosatini takomillashtirish konsepsiyasiga asosan Farg‘ona viloyatida faoliyat yuritayotgan yuridik va jismoniy shaxslar hayotida bir qator ijobiy o‘zgarishlar bo‘lishi kutilayotgani aytib o‘tildi:
- davlat maqsadli jamg‘armalariga yuridik shaxslarning oboroti (tushumi)dan undiriladigan 3,2 foizli majburiy ajratmalarni bekor qilinishi natijasida viloyatda faoliyat yuritayotgan tadbirkorlarning ixtiyorida qoladigan foyda 115,7 mlrd. so‘mni tashkil etishi;
- yuridik shaxslardan olinadigan foyda solig‘i stavkasi 14 foizdan 12 foizga (tijorat banklari uchun 22 foizdan dan 20 foizga) pasaytirilishi natijasida yuridik shaxslarining sof foydasi 4,0 mlrd. so‘mga oshishi;
- 8 foizli sug‘urta badalining bekor qilinishi natijasi viloyat fuqarolarining ixtiyorida 371,6 mrld. so‘m mablag‘ qolishi;
- dividendlar va foizlar ko‘rinishidagi daromadlar bo‘yicha to‘lov manbasidan ushlab qolinadigan foyda solig‘i stavkasi 10 foizdan 5 foizga pasaytirilmoqda, natijada, tadbirkorlarning real daromadlari viloyat bo‘yicha 7,7 mrld. so‘mga oshishi kutilmoqda.
