Inson huquqlari bo‘yicha O‘zbekiston Respublikasi Milliy Markazida 1-noyabr kuni Germaniya Bundestagining “GFR—Markaziy Osiyo” parlament guruhi raisi Manfred Grund boshchiligidagi delegatsiya bilan uchrashuv bo‘lib o‘tdi. Bu haqda O‘zA xabar bermoqda.
Uchrashuvda BMT Inson huquqlari bo‘yicha kengashining joriy yil may oyida Jenevada o‘tkazilgan 39-sessiyasida O‘zbekistonning inson huquqlari bo‘yicha xalqaro majburiyatlari bajarilishi yuzasidan taqdim etgan milliy ma’ruzasidagi masalalar, mamlakatdagi sud-huquq tizimi, davlat boshqaruvi organlarining voyaga yetmaganlarni noqonuniy mehnatga jalb etishning oldini olishdagi faoliyati, hukumat va fuqarolar o‘rtasida muloqotni amalga oshirishning yangi tizimi yo‘lga qo‘yilgani, so‘z va fikr erkinligini ta’minlash borasidagi islohotlar xususida so‘z yuritildi.
“Prezident Shavkat Mirziyoyev tashabbusi bilan O‘zbekistonda yuritilayotgan tashqi siyosat e’tirofga loyiq, — dedi delegatsiya rahbari Manfred Grund. — Xususan, Germaniya bilan turli sohalarda hamkorlik kengayayotgani, ishbilarmonlarimiz mamlakatingiz bozoriga kirishga qiziqish bildirayotgani o‘zaro munosabatlar rivojlanib borayotganidan dalolat. Ushbu aloqalar siyosiy sohada ham izchillik kasb etib bormoqda”.
Suhbat chog‘ida inson huquqlarini himoya qilishda erishilayotgan yutuqlar bilan birga sud-huquq tizimini yanada takomillashtirish, mavjud kamchiliklarni bartaraf etish, bu borada o‘zaro hamkorlikni mustahkamlash, soha vakillari o‘rtasida tajriba almashishni tizimli yo‘lga qo‘yish yuzasidan fikr almashildi.
O‘zbekiston Respublikasi Prezidenti huzuridagi Strategik va mintaqalararo tadqiqotlar instituti direktori V.Norov bilan uchrashuvda O‘zbekiston va Germaniya munosabatlari so‘nggi yillarda ijtimoiy-siyosiy, savdo-iqtisodiy sohalarda rivojlanib borayotgani qayd etildi.
Muloqotda ikki tomonlama hamkorlikni fan-texnika, mashinasozlik, innovatsion loyihalar, oliy ta’lim tizimi, parlamentlararo munosabatlar sohalarida yanada rivojlantirishga doir dolzarb masalalar muhokama qilindi.
Shu kuni “GFR—Markaziy Osiyo” parlament guruhi delegatsiyasi O‘zbekiston Xotin-qizlar qo‘mitasida bo‘lib, ijtimoiy hayotda xotin-qizlarning rolini oshirish borasidagi ishlar bilan tanishdi, Jahon iqtisodiyoti va diplomatiya universiteti rahbariyati va talabalar bilan uchrashdi.