Ayni kunlarda Indoneziyaning Jakarta hamda Palembang shaharlarida XVIII yozgi Osiyo o‘yinlari davom etmoqda. Xabaringiz bor, Ravshan Haydarov boshchiligidagi futbol bo‘yicha O‘zbekiston olimpiya terma jamoasi Osiyo o‘yinlarining chorak finalida Janubiy Koreyaga 3:4 hisobida yutqazib, turnir bilan xayrlashdi.
Kecha esa ijtimoiy tarmoqlarda bosh murabbiy va futbolchilarning O‘zbekiston futbol assotsiatsiyasi birinchi vitse-prezidentidan uzr so‘ragani aks etgan video paydo bo‘ldi. “Championat.asia” nashri Umid Ahmadjonov bilan mazkur video borasidagi fikri bilan qiziqib, u bilan suhbat tashkil etdi. Quyida ushbu subatni to‘liqligicha o‘qishingiz mumkin:
— Xayrli kun, Umid Muhammadjonovich! Jakartada charchash yo‘qmi?— Salom! Charchashga vaqt yo‘q desa to‘g‘riroq bo‘ladi (kuladi).
— Futbolchilarga nima bo‘ldi? Chempion bo‘ladi, deb kutgandik...
— Biz ham bunga katta umid bog‘lagandik. O‘yinni ko‘rgan bo‘lsangiz kerak, nasib qilmadi. Hamma birdek harakat qildi. Endi sportning boshqa turlarida oltin medallar yo‘lida kurash olib boryapmiz.
— Bilishimizcha, futbolchilarning natijasi rahbariyatga yoqmagan ekan...
— Buni kim aytdi? Agar futbolchilar umuman harakat qilmay, raqibni shunchaki o‘tkazib yuborganlarida fikringizga qisman qo‘shilishim mumkin edi. Axir ular maydonda jonlarini berib o‘ynashdi. Bizga eng keragi ham aslida shu.
— Bunday deyayotganimning sababi — kecha hamma joyda tarqalib ketgan Ravshan Haydarov hamda futbolchilarning sizga murojaati...
— To‘g‘risini aytsam, videoni ertalab sizning saytingizda ko‘rdim. Jamoa a’zolari chin ko‘ngildan nimadir qilmoqchi bo‘lishgan ekan. Ammo bunday narsani hamma joyga tarqatish birinchi xato. Qolaversa, nima bo‘lganini hammamiz ko‘rdik, demak, jamoaning ortiqcha tushuntirish berishiga hojat yo‘q. Biz ulardan buni talab qilmaymiz.
— Rosti men ham shunga hayron bo‘lgandim.
— Bu ishni kim qilganini tagiga yetdik. Yomon niyatda qilmagan, shunchaki, yoshlik qilgan. Mag‘lubiyat bizniki, keyingi safar xatolar ustida biz ishlashimiz kerak. G‘alaba esa muxlislarniki, biz xalqimizni xursand qilish yo‘lida mehnat qilamiz. Sportchilar bilan uchrashganda ham doim shuni ta’kidlayman. Chunki o‘zimga ham Prezidentimiz asosiy maqsadim odamlar ko‘zida quvonch va baxt ko‘rish, deb aytganlar. Sportchilar shu yo‘lda harakat qilishlari, sport esa sog‘lom turmush tarzini targ‘ib qilishi kerak.
— Demak, jamoaga hech qanday e’tiroz yo‘q?
— Qanday e’tiroz bo‘lishi mumkin?! Bu aslida norasmiy musobaqa. Biz shunchaki futbolchilarni, muxlislarni uyg‘otib olish uchun ham har qanday o‘yinda, musobaqada g‘olib bo‘lish uchun o‘ynayapmiz. Futbolchiga nima farqi bor u qanday o‘yin ekanini, terma nomidan maydonga tushyaptimi, borini berishi shart. Koreyaga qarshi o‘yinda yigitlar buni sidqidildan bajarishdi. Asosiy maqsadimiz esa Tokio—2020 va Qatar—2022. Shuning uchun ham xorijdan mashhur mutaxassislarni taklif qildik.
— Hakamlar haqida nima deya olasiz?
— Hech narsa demayman. Ular o‘yinni yaxshi boshqarib bordi. Biz o‘z xatolarimiz evaziga mag‘lub bo‘ldik. Xato esa hammada ham bo‘lib turadi
— Ob-havo, maydon holati haqida-chi?
— Har ikki jamoa bir xil sharoitda to‘p surdi. To‘g‘ri, ilqim ancha murakkab edi biz uchun. Biz tribunada o‘tirib ba’zida nafas olishga qiynaldik. Lekin unutmaylikki, Osiyo o‘yinlariga kelgan hamma sportchi shu iqlim bilan to‘qnashmoqda. Sportning qiziq tarafi ham, murakkabligi ham shunda. Biz bunga doim tayyor turishimiz kerak.
— Javobingiz uchun rahmat! Musobaqa davomida omad yor bo‘lsin!
— Sizga ham rahmat. Faqat bitta iltimos, saytga qo‘ymoqchi bo‘lsangiz o‘zingiz yana bir qararsiz, noto‘g‘ri tushunib yurishmasin. Ravshan aka ham, yigitlarga ham, videochilarga ham o‘zimiz tushuntirib qo‘yamiz. O‘zi shundoq ham mag‘lubiyatni hazm qila olishmayapti, odamlarning gapi ularni bundan battar ezadi. Shuning uchun o‘zim ham qattiq gapirganim yo‘q.
Izoh (0)