O‘zbekistonda joriy yil 6 oyi davomida qidiruvdagi 2 mingdan ortiq shaxs ushlandi
O‘zbekistonda joriy yil 6 oyi mobaynida umumiy jinoyatchilik 38,7, jumladan, talonchilik 58,8, bosqinchilik 58,6, bezorilik 50,1, tovlamachilik 45,5, o‘g‘rilik 44,4, firibgarlik 39,2, qasddan badanga og‘ir shikast yetkazish 17,7 va qotillik 17,6 foizga kamaydi. Bu haqda Bosh prokuratura matbuot xizmati ma’lum qildi.
O‘tgan olti oyda Idoralararo tezkor-qidiruv guruhi tomonidan 4 ming 270 og‘ir va o‘ta og‘ir jinoyatlar fosh etildi. Jinoyatni hisobdan yashirish bo‘yicha 662 holat aniqlandi, shuningdek, jinoyat haqidagi ariza va xabarlarni qasddan yashirgan 20 shaxsga nisbatan jinoyat ishi qo‘zg‘atildi. Qidiruvdagi 2 ming 295 shaxs ushlandi. Bedarak yo‘qolganlik haqidagi 150 dan ortiq materiallar o‘rganilib, tegishli qarorlar qabul qilindi va jinoyat ishlari qo‘zg‘atildi.
Bevosita prokuratura organlari tomonidan 148 ming 29 murojaat ko‘rib chiqildi, 141 ming 830 fuqaro qabul qilindi. Natijada sudlarga 7,4 milliard so‘mlik zararni undirish haqida 579 ariza berildi. Ming nafar shaxs intizomiy va ma’muriy javobgarlikka tortildi. Qo‘pol qonunbuzilishi holatlari bo‘yicha 147 jinoyat ishi qo‘zg‘atildi. 23,9 miliard so‘mlik ish haqi, pensiya, aliment va boshqa to‘lovlarni olishda amaliy yordam ko‘rsatildi.
Iqtisodiy jinoyatlar, xufiyona iqtisodiyot va korrupsiyaga qarshi kurashni kuchaytirish bo‘yicha ko‘rilgan choralar natijasida 4 ming 19 huquqbuzarlik aniqlanib, 1 ming 886 ma’muriy va 2 ming 114 jinoyat ishi qo‘zg‘atildi.
O‘tkazilgan tadbirlar natijasida 557 yashirin sex yuritish bilan bog‘liq jinoyat ishlari qo‘zg‘atildi. 1884 sub’ektning faoliyatiga qonuniy tus berilib, buning natijasida 2 mingdan ziyod yangi ish o‘rni yaratildi. Poraxo‘rlikka qarshi kurashish borasida 445 ta jinoyat aniqlandi.
Tibbiyot buyumlari va dori-darmon bilan savdo qilish qoidalari hamda narxlarni belgilash tartibi buzilishining oldini olish maqsadida savdo qoidalari va narxlarni belgilash bilan bog‘liq 82 holat aniqlandi.
