Toshkent shahar bojxona boshqarmasi xodimlari tomonidan sifatsiz dori-darmon va farmatsevtika mahsulotlarini olib kirish bilan bog‘liq qonunbuzarlik holatlarining oldini olishga qaratilgan chora-tadbirlar olib borilmoqda. Bu haqida Davlat bojxona qo‘mitasi axborot xizmati ma’lumotiga tayanib, O‘zA xabar bermoqda.
Jumladan, Toshkent shahar bojxona boshqarmasining “Bosh pochtamt” TIF bojxona postida Toshkent shahrida istiqomat qiluvchi bir nechta fuqarolar nomiga Rossiya Federatsiyasidan jo‘natilgan pochta jo‘natmasi niqobi ostida dori vositalari va tibbiyot buyumlarini deklaratsiyada ko‘rsatmasdan, noqonuniy olib kirishga urinish holatlari aniqlandi.
Jo‘natmalarni bojxona nazoratining texnik vositadan foydalanib, bojxona ko‘rigidan o‘tkazish davomida CN-23 shaklidagi bojxona deklaratsiyasida ko‘rsatilmagan 965 konvalyuta, 751 quti hamda 113 flakonda har xil dorilar borligi ma’lum bo‘ldi. Dastlabki ma’lumotlarga ko‘ra, mazkur dori-darmonlarning qiymati qariyb 277 million so‘mni tashkil etadi.
Shuningdek, Toshkent shahar bojxona boshqarmasining “Keles” temir yo‘l chegara bojxona posti xodimlari “Olmaota—Toshkent” yo‘lovchi poyezdi yo‘lovchilarining qo‘l yuklarini bojxona nazoratidan o‘tkazish paytida qo‘shni davlat fuqarosi yo‘lovchi bojxona deklaratsiyasida ko‘rsatilmagan hamda bojxona xodimining og‘zaki so‘rovida ma’lum qilmagan qiymati 27,5 million so‘mdan ortiq 218 dona turli xil darmon dorini olib kirishga uringani aniqlandi. Xuddi shu poyezddagi boshqa bir yo‘lovchi — qo‘shni davlat fuqarosi qiymati 16 million so‘mlik 1 080 dona dori-darmonni bojxona bayonnomasida qayd etmasdan turib, yashirincha olib kirishga uringani aniqlandi.
Hozirda mazkur holatlar yuzasidan bojxona tekshiruvlari va surishtiruv harakatlari davom ettirilmoqda.
Izoh (0)