Qashqadaryoda “Qorabayir” otchilik majmuasi ochildi
Qashqadaryo viloyatining Yakkabog‘ tumanida “Qorabayir” otchilik majmuasi ochildi. Bu haqda “Xalq so‘zi” xabar bermoqda.
Qariyb 6 oyda qurib bitkazilgan zamonaviy majmuada 34 milliard so‘mlik qurilish ishlari olib borildi. Unda yopiq manej, sayyohlar va shartnoma asosida ot olib ketishga keladigan mehmonlar uchun mehmonxona, 80 o‘rinli restoran, shuningdek, chavandozlarni o‘qitishga mo‘ljallangan o‘quv xonalari, mashg‘ulot o‘tish zallari mavjud.
200 otga mo‘ljallangan ushbu majmua o‘z nomi bilan qorabayir zotli otlarni ko‘paytirish, tayyorlash va realizatsiya qilishga mo‘ljallangan. Yetishtirilgan otlarni sportga tayyorlash uchun barcha sharoitlar yaratilgan. 4 ta blokdan iborat otxonalarda 1 yoshgacha, uch yoshgacha va undan katta yoshdagi otlar alohida o‘rgatiladi. Bundan tashqari, otlarni suvda va qumda yurgizadigan manejlar barpo etilgan.
Majmuaga hozir qorabayir otlardan 50 bosh olib kelindi. Ulardan nasl olinib, sonini 200 taga yetkazish rejalashtirilgan.
Majmuaning umumiy yer maydoni 1204,6 gektar bo‘lib, shundan 10 gektari qurilish maydoni, 200 gektari ozuqa ekinlari yetishtiriladigan suvli maydonlarni, qolgani tug‘ish yoshidagi otlarni boqishga mo‘ljallangan yaylov yerlarini tashkil etadi.
Ochilish marosimida ot sporti musobaqalari, ko‘rgazmali chiqishlar hamda keng dasturdagi konsert namoyish etildi.
