O‘zbekistonning inson huquqlarini ta’minlashdagi tashabbuslari Vashingtonda e’tirof etildi

Vashingtondagi Milliy press-klubda “O‘zbekistonning inson huquqlarini ta’minlash borasida erishgan yutuqlari va istiqboldagi vazifalar” mavzuida konferensiya bo‘lib o‘tdi. Bu haqda O‘zA xabar bermoqda.

Inson huquqlari bo‘yicha O‘zbekiston Respublikasi Milliy markazi, Xalqaro press-klub, O‘zbekiston elektron ommaviy axborot vositalari milliy assotsiatsiyasi, O‘zbekistonning AQShdagi elchixonasi va qator xalqaro tashkilotlar hamkorligida tashkil etilgan anjumanda taniqli olimlar, mutaxassislar, OAV vakillari ishtirok etdi.

Oliy Majlis Senati Raisining birinchi o‘rinbosari S.Safoyev, Inson huquqlari bo‘yicha O‘zbekiston Respublikasi Milliy markazi direktori A.Saidov, fransiyalik tarixchi olim, sotsiolog M.Laryuel, Human Rights Watch tashkilotining Markaziy Osiyo bo‘yicha rahbari S.Sverdlov, O‘zbekiston elektron ommaviy axborot vositalari milliy assotsiatsiyasi boshqaruvi raisi F.Abduxoliqov, Xalqaro press-klub rahbari Sh.Qudratxo‘jayev va boshqalar O‘zbekistonda demokratik huquqiy davlat, kuchli fuqarolik jamiyati barpo etish, inson huquqlarini ta’minlashda OAV rolini kuchaytirish, mamlakatning xalqaro maydonda munosib o‘rin egallashiga yo‘naltirilgan kompleks chora-tadbirlar amalga oshirilayotganini ta’kidladi.

Konferensiyada so‘nggi yillarda O‘zbekistonda inson huquqlari bo‘yicha amalga oshirilayotgan ishlar dunyo jamoatchiligi tomonidan alohida e’tirofga sazovor bo‘layotgani qayd etildi.

Tadbirda mamlakatda sud hokimiyatining fuqarolar huquq va manfaatlarini himoya qilishdagi roli, sud-huquq tizimini isloh qilish sohasida erishilgan natijalar yuzasidan fikr almashildi.

Soha mutaxassislari jurnalistlarning savollariga javob qaytardi.