Germaniyaning “Germaniya uchun alternativa” o‘ta o‘ng partiyasi muhojirlar orasidan Usama ben Ladenning sobiq qo‘riqchisini topdi va u davlatdan ijtimoiy nafaqa olayotganligini aniqladi. Bu haqda Deutsche Welle xabar berdi.
Partiya Shimoliy Reyn-Vestfaliya federal yeri hukumatiga so‘rovnoma yubordi va Tunis fuqarosi hamda “birinchi raqamli terrorchi” shaxsiy qo‘riqlov xizmatining sobiq xodimi Sami A. qochoq maqomida ekanligi va davlatdan 1 167 yevro miqdoridagi nafaqa olayotganligini aniqladi.
U Germaniyada ekstremist hisoblanadi, biroq deportatsiya qilinmagan. 2017-yilda Germaniya sudi Sami A. vataniga qaytgan taqdirda unga ta’qib va qiynoqqa solish tahdid qilishi mumkinligi haqida qaror qabul qilgan.
Germaniya rasmiylari 2006-yildan buyon uni deportatsiya qilishga uringan. Sami A. esa ko‘p yillardan buyon GFR hududida qolish huquqi uchun kurash olib boradi. U GFRga 1997-yilda talaba sifatida kelgan. 1999-yildan 2000-yilga qadar Afg‘onistonda bo‘lgan va ben Ladenning qo‘riqchisi lavozimini qo‘lga kiritgan. Hozirgi vaqtda u Germaniyada rafiqasi va to‘rt nafar farzandi bilan yashab kelmoqda. Ular Germaniya fuqaroligiga ega.
Izoh (0)