Narkosavdogarlikni kasb qilgan farg‘onalik ayol 11 yilga qamaldi

Farg‘ona viloyati Bag‘dod tumanida yashovchi Muhayyo Mamurovaga avval ham jinoyat sodir etgani uchun ozodlikdan mahrum qilish jazosi tayinlangandi. Ammo u xatosidan to‘g‘ri xulosa chiqarmadi, 5 farzandi diydoridan o‘zini yana benasib qildi, deb xabar beradi O‘zA.

U 2017-yilning yanvar oyida dastlabki tergovda shaxsini aniqlashning imkoni bo‘lmagan Ulug‘bek va Maqsud ismli Tojikistonda yashovchi tanishlari bilan til biriktirib, 1 kilogramm gashish giyohvandlik vositasini O‘zbekiston chegarasidan noqonuniy olib o‘tishni rejalashtirdi.

Telefon qo‘ng‘irog‘idan so‘ng sheriklari 3 ming dollarga baholangan ushbu giyohvandlik moddasini Bag‘dod tumanining Do‘rmoncha qishlog‘iga olib kelib berdi. Maxsus belgi ostida og‘uni yerga ko‘mib qo‘ydi. Ikki kundan so‘ng ushbu modda uchun 1300 dollar olib, qolgan qismini keyin berishga kelishishdi.

M. Mamurova giyohvandlik moddasini yashash xonadonida saqlab, fevral oyida uning 59,92 grammini qo‘qonlik N. Tursunovaga 3 million 500 ming so‘mga sotadi. 939,75 gramm qismini noma’lum kimsalarga yetkazib berib, daromadga ega bo‘ladi.

Huquq-tartibot idoralari xodimlari tomonidan o‘tkazilgan tezkor tadbir davomida xonadonidan qora rangli sellofan paketga o‘ralgan 0,33 gramm og‘u daliliy ashyo sifatida olindi.

Jinoyat ishlari bo‘yicha Qo‘qon shahar sudi tomonidan JKning tegishli moddalariga asosan M. Mamurova o‘ta xavfli retsidivist deb topildi va unga 11 yil ozodlikdan mahrum qilish jazosi tayinlandi.

Izoh(0) Biz Telegram’da

Ulashing:

Izoh