Kecha “Real” 2 ochko yo‘qotdi. Bugun “Barselona” Kataloniya derbisida, “Atletiko” esa “Valensiya” bilan o‘ynaydi

Ispaniya La Ligasining 22-turiga kelib Madridning “Real” klubi yana bir bor ochko yo‘qotdi. Shu tariqa “Qirollik klubi” mavsum boshidan buyon 10-o‘yinni o‘z foydasiga hal qila olmadi.

“Qurbaqalar” nomi bilan yuritiladigan “Levante” mehmoni bo‘lgan madridlik futbolchilar so‘nggi daqiqalarda g‘alabani qo‘ldan chiqardi. Bungacha Zidan boshchilik qilayotgan jamoa ketma-ket ikki turni yirik g‘alabalar bilan yakunlashga erishgandi — “Deportivo” 7:1 va “Valensiya” 4:1. Ispaniya Kubogidan chiqib ketgani yetmaganidek, jamoa endi La Ligadagi muvaffaqiyatni ham xavf ostiga qo‘yib ulgurdi.

Har ikki musobaqa g‘olibligi uchun asosiy da’vogar bo‘lib turgan “Barselona” bugun Kataloniya derbisida o‘ynaydi. Kubokning chorak finalida “Espanyol” o‘z uyida “Barsa”ni yengishga muvaffaq bo‘lgandi. Bugun klub o‘sha ishni La Liga doirasida ham takrorlashga urinib ko‘radi.

Turning markaziy o‘yinida esa kumush medallar uchun kurash olib borayotgan “Atletiko” va “Valensiya” klublari o‘zaro to‘qnash keladi. Tomonlarning “Mestalya” stadionida kechgan o‘yinida hisob ochilmagandi — 0:0.

Montella boshchilik qilayotgan “Sevilya” Ispaniya Kubogining finaliga yaqin turgan bo‘lsa-da, La Ligada kecha yirik mag‘lubiyat qabul qilib oldi.

Ispaniya La Ligasi 22-tur bellashuvlari 2-fevral, juma

“Real Sosyedad” — “Deportivo” 5:0

3-fevral, shanba

“Eybar” — “Sevilya” 5:1

“Betis” — “Vilyarreal” 2:1

“Alaves” — “Selta” 2:1

“Levante” — “Real Madrid” 2:2

4-fevral, yakshanba“Xetafe” — “Leganes” 16:00“Espanyol” — “Barselona” 20:15“Jirona” — “Atletik” 22:30“Atletiko” — “Valensiya” 00:45

5-fevral, dushanba“Las-Palmas” — “Malaga” 01:00