Qamchiqda kutilayotgan bo‘ron sabab Toshkent—Andijon—Toshkent temiryo‘l yo‘nalishida qo‘shimcha reyslar tashkil etildi
“O‘zbekiston temir yo‘llari” AJ 9—13-yanvar kunlari Toshkent—Andijon—Toshkent yo‘nalishida qo‘shimcha reyslarni tashkil etdi. Bu haqda jamiyat matbuot xizmati xabar berdi.
O‘zbekiston Favqulodda vaziyatlar vazirligi 11—12 va 14-yanvar kuni Qamchiq dovonida bo‘ronli ob-havo kutilayotgani haqida xabar qilgandi. “O‘zgidromet” dovon hududi hamda “Toshkent—O‘sh” A-373 avtomobil yo‘liga qor yog‘ishi, vaqti-vaqti bilan kuchli tuman tushib, ko‘rish chegarasini 50—100 metrga qadar cheklashi kutilayotgani, shamol tezligi esa 22—25 metr/sekundga yetib, yo‘llarda qor uyumlari va muzlamalar paydo bo‘lishi mumkinligi haqida ogohlantirdi.
Favqulodda vaziyatlar vazirligi belgilangan muddatlarda Qamchiq dovoni bo‘ylab avtotransportlarda yo‘lga chiqishmaslikni tavsiya qildi. “O‘zbekiston temir yo‘llari”dagi manbaning xabar qilishicha, FVVning tavsiyasidan so‘ng temir yo‘l chiptalariga bo‘lgan talab oshib ketgan va qo‘shimcha reyslar tashkil etilgan.Mavzuga doir: “Mashinada qolsak, o‘lishimiz aniq edi”. Yangi yil arafasida Qamchiqda yuzlab odamlarning hayoti saqlab qolindi
Qo‘shimcha qo‘yilgan poyezdlar qatnov jadvali quyidagicha:
- №560 “Toshkent – Andijon” poyezdi Toshkentdan soat 21:15 da yo‘lga chiqib, Andijonga 03:16 da yetib keladi.
- №559 “Andijon – Toshkent” poyezdi Andijondan soat 07:15 da jo‘nab, Toshkentga soat 13:55 da keladi.
