AQShda jarimaga tortilgan xot-dog sotuvchisiga yordam berish uchun 70 ming dollar yig‘ildi

AQShning Kaliforniya shtatidagi Berkli Universiteti politsiyasi Beto ismli 34 yoshli xot-dog sotuvchisini jarimaga tortdi va litsenziyasiz savdo qilgani uchun uning qopchig‘idan 60 dollar oldi. Bu haqda TJournal xabar berdi.

Hodisani shu shaharda yashovchi Martin Flores ismli kishi suratga olgan. U politsiyachi bilan qilayotgan xatti-harakatining qonuniyligi bo‘yicha bahslashgan.

Xabar qilinishicha, tumanda beshta xot-dog sotuvchisi bo‘lgan, biroq faqat Beto jarimaga tortilgan, qolganlar esa og‘zaki ogohlantirilgan.

Shundan so‘ng Flores sotuvchiga shaxsiy, yuridik va professional masalalarda yordam berish uchun GoFundMe saytida sahifa ochgan. U yig‘ilgan pullar Betoga va hayotini shu tariqa tebratayotgan boshqa sotuvchilarga yordam berish uchun sarflanishini ma’lum qilgan. Ayni vaqtda foydalanuvchilar tomonidan yig‘ilgan mablag‘ miqdori 70 ming dollardan oshgan.

Betoning qayd etishicha, u qurilish kompaniyasidan doimiy daromadga ega, xot-doglarni esa qo‘shimcha pul ishlash uchun sotadi.