El-Klasiko ishqida yo‘lga chiqqan sayohatchilar Frankfurtga yetib keldi
#tour_de_clasico ishtirokchilari 10-avgust kuni Toshkent—Frankfurt yo‘nalishida parvoz qilib, Germaniyaning iqtisodiy poytaxtiga yetib keldi.
Serquyosh o‘lkadan yo‘lga chiqqan jamoamiz ust-boshi anchagina yupun edi. Frankfurtda bizni yomg‘irli ob-havo qarshi oldi. Ikki yil Myunxenda tahsil olgan, keyingi olti yilini Shtutgart oliygohida o‘tkazgan do‘stim Mansur Jumaboyev Frankfurtda bizga hamrohlik qildi. Uning aytishicha, Germaniyada ko‘chaga soyabon bilan chiqqan ma’qulroq. Garchi quyosh nur sochib turgan bo‘lsa-da, qandaydir soatlar ichida sharros yomg‘ir quyib bermasligiga hech kim kafolat bera olmaydi.
Frankfurt Yevropaga xos bo‘lgan tarzda ancha ozoda. Masalan, Kuala-Lumpur yoki Jakarta bilan solishtirganda osmono‘par binolar soni Osiyoning bu ikki shahridan kamroq. Biroq aynan ozodalik masalasida Mayn daryosi bo‘yidagi bu shahar kishining havasini keltiradi.
E’tiborimni eng ko‘p tortgan jihat Frankfurt tramvayi bo‘ldi. Poytaxtimiz Toshkent uchun tramvay endilikda tarix. Samarqand tramvay bilan yaqinda tanishdi. Agar kimdadir transportning shu turiga e’tiroz bo‘lsa, shu inson Frankfurtga tashrif buyurib, uning afzalliklari bilan tanishishini istardim. U ekologik toza, na qolgan transportlar va na odamlar qatnoviga xalal beradi. Chorrahalar bilan kesishgan izlari asfalt bilan hamohanglik hosil qilganki, bunda siz bevosita tramvay izlarini bosib o‘tganingizni sezmaysiz ham. Frankfurt aholisi bu transport turidan faol foydalandi — tramvay shaharning ajralmas bir qismi.
Frankfurtga tashrif buyuruvchilar shaharni yuqoridan tomosha qilishni istashsa, Main Tower’ga tashrif buyurishlari mumkin. 200 metr balandlikda joylashgan bu binodan diqqatga sazovor barcha nuqtalar ko‘rinadi. Bunda shu shaharga tegishli bo‘lgan “Ayntraxt” futbol klubining stadionini ham uzoqdan ko‘rish mumkin.
Azimut Travel va “Turizm” gazetasi tashkil qilgan tur ishtirokchilari 10-avgustda kuni bilan Frankfurtda bo‘ldi. Bugun — 11-avgust tushga qadar Frankfurt “Eski shahari”da bo‘lish tur rejasiga kiritilgan. Shundan so‘ng “Frankfurt—Barselona” yo‘nalishi bo‘ylab parvoz qilish uchun aeroportga yo‘l olamiz.
