O‘zbekiston kasaba uyushmalari federatsiyalari kengashida Xalqaro mehnat tashkiloti Sharqiy Yevropa va Markaziy Osiyo mamlakatlari byurosining munosib mehnat masalalarini texnik qo‘llab-quvvatlash guruhi mehnat muhofazasi bo‘yicha bosh mutaxassisi Valentin Mokanu bilan uchrashuv bo‘lib o‘tdi. Bu haqda kengash matbuot xizmati ma’lum qildi.
Uchrashuv ijtimoiy sheriklarning XMT vakili bilan uch tomonlama maslahatlashuvlari doirasida bo‘lib o‘tdi. Unda Mehnat vazirligi va Savdo-sanoat palatasi vakillari ham ishtirok etdi.
Shuningdek, mehnat muhofazasi va xavfsizligini tashkil etishning samarali tizimini ishlab chiqish bo‘yicha uch tomonlama seminar ham o‘tkazildi.
Mahalliy mutaxassislar Valentin Mokanudan XMTning mehnat muhofazasi masalalaridagi strategik yondoshuvi borasida batafsil ma’lumotlar oldi. Xalqaro tashkilotning sherik davlatlarida mehnat muhofazasi bo‘yicha Milliy dasturni yangilash amaliyoti bo‘yicha tajriba almashildi.
Valentin Mokanu O‘zbekistonda mehnat muhofazasi sohasidagi amaliy ishlar boshqa mamlakatlar uchun o‘rnak bo‘lishi mumkinligini alohida qayd etdi.
Izoh (0)