Diyego Kosta
“Chelsi” asosiy hujumchisi bo‘lgan Diyego Kostani yozda sotib yuboradi. Bosh murabbiy Antonio Konte asli braziliyalik bo‘lgan, keyinroq Ispaniya fuqaroligini qabul qilgan futbolchini o‘z o‘rniga qaytarishga shoshilayotgani yo‘q.“Sports.ru” nashrining xabar berishicha, Kosta o‘z ustida ikki barobar ko‘proq mehnat qilib ham, Kontening mehrini qaytib olishi qiyin bo‘ladi. Italiyalik bosh murabbiy Kosta misolida qolgan futbolchilarga jamoada alishtirib bo‘lmas futbolchining o‘zi yo‘qligini tushuntirish niyatida. Eng asosiysi, Roman Abramovich ham mutaxassis fikrlarini qo‘llab-quvvatlamoqda.
Qayd etish kerak, Kostaga Xitoy klublari yaxshigina taklif bilan chiqqach, futbolchi o‘zligini unutdi va mashg‘ulotlarga yengil nazar bilan qaradi. Biroz keyinroq esa “Chelsi”dan uning sharoitlarini yanada yaxshilashni talab qila boshladi.
Ma’lumot uchun, Premyer-liganing “Lester”ga qarshi kechgan so‘nggi turida Konte hujumchini maydonga tushirmay turib ham, raqibini 3:0 hisobida mag‘lub etishga muvaffaq bo‘lgandi.
Kostaga kim da’vogar?
“Sports.ru” ma’lumotiga ko‘ra, Ispaniyaning “Barselona” va “Atletiko” klublari Kostani o‘z yurtiga qaytarish masalasini ko‘rib chiqmoqda. Kataloniya klubi bu borada harakatni boshlab yuborgan. “Atletiko” esa o‘zining sobiq futbolchisini qayta qo‘lga kiritish rejasini ishlab chiqmoqda.
Taxminlarga ko‘ra, Madrid klubining asosiy hujumchisi Antuan Grizmann yozda katta ehtimol bilan “Manchester Yunayted” safiga ko‘chib o‘tadi. Bu holat esa “Atletiko”ni Diyego Kostaning da’vogari bo‘lishga undaydi. Avvalroq futbolchining xizmatidan foydalanish istagida bo‘lgan Xitoy klubi yiliga 30 million yevro maosh taklif qilayotgani aytilgandi.
Memfis Depay
“Manchester Yunayted” 2015-yilda “PSV”dan sotib olingan Memfis Depayni sotib yuborishga qarshi emas. Klub futbolchiga narx ham belgiladi — 17,5 million funt.
Avvalroq Fransiyaning “Lion” klubi ikki bor taklif bilan chiqib, Depay uchun 11 va 13 million funt va’da qilgan va har ikki safar ham rad javobini olgandi. Qayd etish kerak, Depay “Yunayted” uchun 25 millionga tushgan.
Lui Van Gal
Memfis Depayni Angliyaga olib kelgan mutaxassis Lui Van Gal murabbiylik faoliyatini yakunlagani haqida e’lon qildi.O‘tgan yili men karyeramni batamom yakunlash haqida o‘ylay boshlagandim. Keyin esa bu qarorni kichik ta’til olish bilan cheklanishga o‘zgartirdim.Hozir tushunib yetyapmanki, endi murabbiylik ishiga qaytmasligim kerak. So‘nggi vaqtlarda oilam bilan bog‘liq ko‘p ishlar bo‘lib o‘tdi. Bu esa menga ogohlantiruvchi qo‘ng‘iroq deya qabul qildim.
Lui Van Gal, murabbiy
Lui Van Gal murabbiy sifatida “Ayaks” va “AZ Alkmaar” klublari bilan jami 4 bor Gollandiya chempionligini qo‘lga kiritgan. “Barselona”ni ikki bor Ispaniya, “Bavariya”ni esa 1 bor Germaniya chempionligi sari yetaklagan. Yuqoridagi mamlakatlarda, shuningdek, Angliyada kubok sohibiga aylangan.
Murabbiy “Ayaks” bilan Yevropa chempionlar ligasi va UEFA kubogida zafar quchgan. Tashkilot Superkubogida muvaffaqiyat qozongan.
“Siti”ga darvozabon kerak
“Everton”ga qarshi o‘yinda 4 ta aniq zarbadan keyin 4 ta gol qabul qilib olgan “Manchester Siti” klubi ustozi Xosep Gvardiola darvoza chizig‘idagi raqobatni kuchaytirishga bel bog‘ladi, deb yozdi “Sports.ru”.
Katta ehtimol bilan Villi Kabalyero “shaharliklar” bilan shartnomasini uzaytirmaydi. Bu holatda Klaudio Bravo bilan raqobatlashadigan kuchliroq posbon kerak bo‘ladi.
Avvalroq Gvardiola “Siti”ning asosiy darvozaboni Jo Xartni kerak emasga chiqargandi, oradan ko‘p o‘tmay esa o‘zi darvozabon muammosiga duch kela boshladi.
Izoh (0)