Xalq deputatlari Toshkent shahar Kengashining 29-dekabrdagi qarori bilan poytaxtdagi yangi ko‘chalarga nomlar berildi va bir qator mavjud ko‘chalar qayta nomlandi, deb yozadi “Gazeta.uz” shahar hokimligiga tayanib.

Foto: “Gazeta.uz”

Foto: “Gazeta.uz”

Shayxontohur tumanida yangi uchastkaga ega Nurafshon ko‘chasi endi Nurafshon aylanma ko‘chasi bo‘ldi, Mirzo Ulug‘bek tumanidagi Mirzo Ulug‘bek shoh ko‘chasi va Parkent ko‘chasi oralig‘ida yaqinda ochilgan ko‘cha esa Taraqqiyot ko‘chasining davomi bo‘ldi.

Uchtepa va Shayxontohur tumanlaridagi Mannon Uyg‘ur ko‘chasi Ko‘kcha Darvoza deya qayta nomlandi, Ko‘kcha Darvoza ko‘chasining o‘zi esa Qoratosh ko‘chasining bir qismi bo‘lish o‘rniga, Ko‘kcha Darvoza tor ko‘chasiga aylandi.

Yakkasaroy tumanidagi Muqimiy va Bobur ko‘chalarini ko‘prik yo‘l orqali birlashtirgan yangi ko‘cha Muqimiy ko‘chasining davomi bo‘ldi.

Olmazor tumanidagi Taraqqiyot ko‘chasi Dilsaroy ko‘chasi sifatida qayta nomlandi, bunga boshqa tumanda shu nomli ko‘cha borligi sabab bo‘ldi.

Yunusobod tumanida sobiq radiostansiya hududidagi eski ko‘chaga Qanoat deb nom berildi.