“Hindiston Afg‘onistondagi terrorchilarni moliyalashtirmoqda” — Pokistonning Afg‘oniston bo‘yicha maxsus vakili

Pokistonning Afg‘oniston bo‘yicha maxsus vakili Osif Durroniy 7-may kuni Hindiston hukumati Afg‘onistondagi terrorchi guruhlarni moliyalashtirayotganini aytgan. Bu haqda Aamaj News nashri xabar berdi.

Manbada aytilishicha, Hindiston moliyalash dasturini amalga oshirishga imkon beruvchi bir qancha ishonchli kuchlar Afg‘onistonda mavjud. Ular vositasida terrorchilarga qurol va mablag‘ yo‘naltirilmoqda.

Pokistonning Afg‘oniston bo‘yicha maxsus vakili Osif Durroniyning aytishicha, Hindiston Afg‘onistondagi hamkorlari orqali “Pokiston Toliboni” qurolli guruhini qo‘llamoqda. Guruhning Pokistonga qarshi qo‘zg‘olonlarini rag‘batlantirmoqda.

“Hindiston bu qo‘zg‘olonlarni faol ushlab turish uchun deyarli 35 milliard hind rupiysi sarflagan”, — degan Durroniy Islomoboddagi Mintaqaviy tadqiqotlar institutida bo‘lib o‘tgan yig‘ilishda.

Shuningdek, Pokiston armiyasi matbuot kotibi Sharif Ahmad Choudri matbuot anjumanida Afg‘oniston terrorchilar uchun boshpanaga aylanganini maʼlum qilgan. Xorijiy kuchlar bu mamlakatdagi “Tahrik-e Tolibon” otryadlarini qurollantirishga urinayotgani aytilgan.