Behzod Yo‘ldoshev Fanlar akademiyasining prezidenti etib saylandi

2017-yilning 10-yanvar kuni O‘zbekiston Respublikasi Fanlar akademiyasida Fanlar akademiyasining prezidentini saylashga bag‘ishlangan Umumiy majlis bo‘lib o‘tdi. Majlisda Fanlar akademiyasi akademiklari, direktorlar kengashi a’zolari ishtirok etdi, deb yozadi akademiya rasmiy sayti.

So‘zga chiqqan akademiklar M.S.Salohiddinov, S.Sh.Rashidova, R.A.Zohidov, B.M.Beglov, B.A.Nazarov, A.A.Asqarov, N.R.Yusupbekov, A.A.Abdullaev, professor Sh.A.Egamberdiyev O‘zbekiston rahbariyati va hukumati tomonidan mamlakat ilm-fani rivojiga alohida e’tibor qaratilayotganini ta’kidlash barobarida akademik fan oldida turgan bir qator dolzarb masalalarni belgilab oldi. Shuningdek, ular O‘zbekiston Respublikasi Fanlar akademiyasi prezidentligiga saylash uchun akademik B.S.Yo‘ldoshevning nomzodini qo‘llab-quvvatladi.

Akademik Yo‘ldoshev Behzod Sodiqovich navbatdagi muddatga Fanlar akademiyasining prezidenti etib saylandi. Majlisda O‘zbekiston Respublikasi Prezidenti Sh.Mirziyoyevga murojaat qabul qilindi.