Saylov kampaniyasida ishtirok etayotgan jurnalistlar uchun amaliy seminar o‘tkazildi
O‘zbekiston Respublikasi Prezidenti saylovini yoritish bo‘yicha Respublika matbuot markazida saylov kampaniyasida ishtirok etayotgan jurnalistlar uchun amaliy seminar o‘tkazildi. Videokonferensaloqa shaklida tashkil etilgan tadbirda milliy va xorijiy ommaviy axborot vositalari vakillari, Prezident saylovini yoritish bo‘yicha Respublika matbuot markazi hamda okrug saylov komissiyalari matbuot markazlari xodimlari qatnashdi.
Seminarda saylov kampaniyasini ochiq va oshkora tashkil qilish, saylovga tayyorgarlik ko‘rish va uni o‘tkazishning barcha bosqichlari haqida mamlakat aholisi va xalqaro hamjamiyatni o‘z vaqtida, keng xabardor qilib borishda OAV hal qiluvchi o‘rin tutayotgani alohida ta’kidlandi.
Saylov komissiyalari bu masalada radio va televideniye, bosma va internet nashrlari bilan faol va samarali hamkorlik qilib kelmoqda. O‘zbekiston Respublikasi Prezidenti saylovini yoritish bo‘yicha Respublika matbuot markazi va okrug saylov komissiyalari matbuot markazlarida jurnalistlar uchun zarur sharoitlar yaratilgan. Markaziy saylov komissiyasi va okrug saylov komissiyalarining majlislarida OAV vakillari ishtirok etmoqda. Bundan tashqari, komissiyalarning majlislari bevosita matbuot markazlarida, onlayn rejimida ham o‘tkazilmoqda.
Markaziy saylov komissiyasi bilan O‘zbekiston Milliy teleradiokompaniyasi, O‘zbekiston Milliy axborot agentligi, “Jahon” axborot agentligi, Elektron ommaviy axborot vositalari milliy assotsiatsiyasi, UzReport axborot agentligi o‘rtasida saylovga tayyorgarlik ko‘rish va uni o‘tkazish jarayonini yoritish yuzasidan imzolangan ikki tomonlama bitimlar o‘zining amaliy natijalarini bermoqda.
Saylov kampaniyasi boshlanganligi e’lon qilinganidan buyon O‘zbekiston OAVlarida bu mavzuda 4380 dan ziyod, jumladan, markaziy va hududiy tele- va radiokanallarda 1700 dan ziyod intervyu, syujet va lavhalar, davriy nashrlarda 1850 dan ortiq, internet nashrlarida 820 dan ziyod materiallar berildi. Xorijiy OAVlarda esa 600 ga yaqin material e’lon qilindi. Markaziy saylov komissiyasi tomonidan mahalliy va xorijiy OAVlarning 500 nafardan ortiq vakili, okrug saylov komissiyalari tomonidan esa 430 dan ziyod mahalliy jurnalist akkreditatsiyadan o‘tkazildi.
Tadbirda saylovga tayyorgarlik ko‘rish va uni o‘tkazishda ochiqlik va oshkoralikni ta’minlashda saylov komissiyalari va jurnalistlarning dolzarb vazifalari, milliy saylov tizimi hamda bu boradagi qonunchilik mazmun-mohiyatini aholi o‘rtasida keng tushuntirish ishlarini tashkil etish, saylov kampaniyasini yoritishda jurnalistika janrlari imkoniyatlaridan, zamonaviy media texnologiyalardan samarali foydalanish, saylov komissiyalari bilan hamkorlikni yanada kuchaytirish kabi masalalar atroflicha muhokama qilindi.
